DILI, STLTIMORLESTE.com – Saláriu mínimu US$ 115 konsidera limita traballador nia poder kompras, tanba osan ne’ebé simu la sufisiente ba nesesidade família.
Prezidente Konfederasaun Sindikatu Timor-Leste (KSTL), Almerio Vila Nova hatete, valór saláriu mínimu atual afeta diretamente traballador nia poder kompras no kondisaun ekonomia família.
Nia hatete, traballador balun uluk bele rai osan kada fulan, maibé agora rendimentu la to’o atu kobre gastus loroloron, nune’e obriga sira halo dívida.
“Gastus la to’o ho saláriu, tanba sira tenke deve fali hodi taka nesesidade família nian,” dehan Almerio ba STL ihá edifisiu KSTL Bemori, Segunda (21/09/2026).
Nia hatete, situasaun ekonomia família ne’ebé difísil bele obriga inan-aman buka fonte rendimentu tan, inklui involve oan sira atu ajuda buka osan.
Almerio hatete, limitasaun rendimentu mos afeta konsumsaun aihan nutritivu, tanba família balun tenke hili aihan ne’ebé baratu atu bele sustenta família.
Nia hatete, situasaun ne’e bele afeta saúde traballador, inklui kazu traballador tama servisu ho hamlaha tanba osan la sufisiente atu sosa aihan.
Tuir Almerio, difikuldade ekonomia família mos bele afeta asesu ba edukasaun no saúde, tanba família sira hasoru limitasaun atu selu nesesidade eskola no aimoruk.
Nia hatete, presiza haree impaktu saláriu kiik laos deit husi aspetu ekonomia, maibé mos husi aspetu sosial no produtividade traballador.
“Saláriu mínimu US$ 115 obriga traballador balun aumenta oras servisu, inklui overtime, hodi bele aumenta rendimentu família,” dehan nia.
Nia hatete, situasaun ne’e bele hamenus tempu traballador iha uma ho família, no iha tempu naruk bele afeta relasaun família no produtividade iha fatin servisu.
Almerio akresenta, problema ekonomia família bele aumenta presaun psicolójika no risku konflitu doméstiku, ne’ebé bele afeta estabilidade família.
Iha parte seluk, traballador Natalino dos Santos hatete saláriu mínimu atual la to’o ba nesesidade família, liuliu bainhira folin sasán sira aumenta.
Nia hatete, osan ne’ebé simu dala barak la to’o semana ida, tanba presiza fahe ba aihan, transporte, edukasaun oan no nesesidade seluk.
“Osan ne’ebé hau simu la to’o atu sosa aihan diak ba semana ida. Dala ruma ami han etu maran tanba osan la to’o,” dehan Natalino.
Nia hatete, bainhira oan moras, família hasoru difikuldade atu sosa aimoruk, enkuantu nesesidade eskola hanesan livru no sapatu mos dala ruma la bele sosa.
Natalino hatete, situasaun ne’e obriga família uza sasán ne’ebé iha, maski roupa, sapatu ka materiál eskola sira sudah estraga.
Enkuantu negosiante tais, Veronica Lopes, hatete folin sasán sira ne’ebé aumenta halo família ho rendimentu kiik difisil atu sosa nesesidade bázika.
Nia hatete, família ho osan menus tenke fó prioridade ba nesesidade hanesan foos, mina, masin no transporte, no la iha kapasidade atu gasta ba nesesidade seluk.
“Família ho osan kiik tenke hili foos, mina no masin. Sira la iha forsa atu gasta ba estilu moris hanesan ema seluk,” dehan Veronica.
Nia hatete, folin sasán ne’ebé sae afeta liuliu família ho membru barak, tanba rendimentu ne’ebé iha tenke fahe ba nesesidade família tomak.
(dom)
