BAUKAU, STLTIMORLESTE.com – Familia Kongregasaun Salezianu sujere lider nasaun Timor Leste nian atu banati tuir hahalok Dom Bosco, hadomi sidadaun sira.
Padre Parokia Igreja Santo Antonio Vila Antiga, Manuel Ximenes da Silva, SDB hatete, sarani neebe hakarak fila fali ba Dom Bosco, tenke sai lideransa neebe diak, tanba ohin loron labarik sira iha sosiedade barak mak lakon respeitu inan aman, tanba menus edukasaun iha eskola, nunee tenke hateke ba ilhas Dom Bosco hafoin forma atetude ema sai atetude ema lo-loos.
“Mensajen neebe hau hakarak husik hela ba lideransa sira tomak, se sai Aman karik, sai Aman neebe diak tuir belun São João Bosco, se espiritu Dom Bosco kuda iha lideransa idak-idak nia moris, nia bele halo Timor nee sai furak liu tan,” rekomenda Parde Manuel ba STL iha Vila Nova, Kuarta (29/01/2025).
Tuir Padre Parokia nee katak, mezmu Timor ukun aan tinan naruk ona, maibe sei iha odiu vingansa ba malu, mosu violensia oin-oin iha sosiedade, tanba lakon respeitu ba malu.
Nia profunda, atu halakon atetude sira nee, prezisa reflete Edukasaun São João Bosco nian, neebe eduka ema hatene respeita, hadomi malu ho haraik aan simu malu nuudar Timoroan.
“Mezmu ideia difirente, maibe tenke rona malu, simu malu, atu nunee lori rai no nasaun nee ba oin,” nia enkoraza
Tuir Padre Manuel katak, atu atinji dezenvolvimentu iha Timor lao ho trankuilidade, tenke simu ideias husi parte hotu hodi evita dezentendimentu, tanba solusaun diak mak simu malu ho ideias sira hafoin tetu implementa servisu.
Enkuantu Prezidente Autoridade Munisipiu Baukau, Veneranda Lemos argumenta, durante servisu sai Prezidente Autoridade Munisipal karakter neebe implementa iha servisu mak hahalok São João Bosco nian.
“Autoridade ida nee antiga alunas, sei hateten atu tuir Dom Bosco, hau tuir hela Dom Bosco nia hanorin, ida nee mak loro-loron bainhira hau hasoru malu ho joven sira sempre komunika malu,” Veneranda hatete.
Veneranda sublina, São João Bosco hadomi foinsae sira, nunee mos Autoridade Munisipal hadomi foinsae sira neebe sempre iha komunikasaun direira ho joven sira, tanba liu husi servisu hamutuk mak atinji planu neebe trasa.
“Entaun ita fo enkorajamentu ba hotu-hotu, atu hanoin katak, mahein sira nia hanorin, sira nia ezemplu bele reforsa enkoraja ita atu lori ita nia rai ba moris ida diak liu tan,” Veneranda hakotu.
(EST 2)