DILI, STLTIMORLESTE.com – Saudoza Domingas Sarmento (Betekou) hakotu ona nia peregrinasaun iha mundu hodi fila hikas ba nain nia kadunan Santo rohan laek.
Saudoza Domingas Sarmento (Betekou) moris iha Aldeia Uani-Uma iha loron 23 fulan Jullu tinan 1948, iha Suku Matahoi Postu administrativu Uatulari Munisipiu Viqueque, saudoza oan husi Mateus da Costa no Saekou, Saudoza oan primeiru husi bin alin nain rua inklui helena freitas matebian ona.
Iha tinan 1981 Saudoza Domingas Sarmento (Betekou) hahu forma uma kain ho Sr, Gaspar Amaral husi Uma lisan Aedere Burutai, ho domin neebe iha Nain Maromak haraik aifuan domin ho oan nain hitu (7) kompostu mane 4 no feto nain 3 mak hanesan, Miguel (matebian ona), Rozita (matebian ona), Juliana (matebian ona), Rofino Xavier Guterres (moris hela), Jacinto Amaral (moris hela), Joaquina Gusmão (moris hela) no Agustinho Pinto (moris hela).
Saudoza Domingas Sarmento (Betekou) nia partisipasaun ba luta libertasaun nasional liu husi Frente Kladestina, iha loron 15 fulan marsu tinan 1980 hahu servisu halo ligasaun kladestina iha Zona Nakukun responsavel zona mak kamarada Alexandre (Sama-eli) iha fatin sira mak hanesan tuir mai nee, Waiwasi-wa Uatulari, Waigada Uatulari, Dukulori Uatulari, Uani-Uma Uatulari.
Husi enkontro iha fatin sira neebe mensiona mak Saudoza Domingas Sarmento (Betekou) hetan kargo foun hanesan Xefe Logistika husi Zona Nakukun nuudar membro OPMT husi vila.
Husi partispasaun hirak nee Saudoza Domingas Sarmento (Betekou) halo regista ona iha Conselhu Conbatentes Libertasaun Nasional (CCLN) iha tinan 2009, nunee estadu timor leste atribui nivel 4A7 ba saudoza maibe prosesu nee tama hela parte reklamasaun tanba la tuir saudoza nia dedikasaun durante.
Saudoza Domingas Sarmento (Betekou) hakotu peregrinasaun hodi fila hikas iha nain nia kadunan Santo tanba hetan sofre moras komplikadu iha fulan marsu tinan 2025, neebe durante nee halao tratamento mediku iha hospital referal de baucau too hakotu iis iha loron 30 fulan jullu tinan 2026 ho oras 4.30 oras Timor Leste.
Lema husi Saudoza Domingas Metakou mak ho laran metin, hakmatek no unidade hodi konta mos hau nia prezensa ami liberta ona patria ida nee maibe dever no obrigasaun atu liberta povu husik hela ba imi kontinua tan to rohan
Iha biban nee Sekretariu Zona Umu Sege, Tomas Soares da Silva liu husi nia diskursu iha Suku Matahoi Posto Administrativu Uatulari Sabado (01/08/2026) hatoo sentidu kondelensia ba familia enlutada neebe saudoza husik hela, iha biban nee Sekteriu Zona hatete maske saudoza mak mate maibe nia esperito akompanha familia, no mate nee hanesan misteriu ida, neebe ema hotu labele ses.
“Moris lases husi Mate, no mate nee misteriu ida neebe husi Nain Maromak, maibe saudoza Domingas Sarmento nia mate lafo sentidu ba ita katak buat hotu hotu sei lakon lae, ninia biografia ita hotu ohin rona sentidu nia moris iha mundu nee saida mak nia halo, saida mak nia bele halo mak hanesan ohin ita rona iha nia biografia, karik nia dokumentus balun la kompleta ikus mai halo kompleta tan,” dehan Sekretariu Zona Umu Sege.
Nunee mos Koordenador Partidu FRETILIN, Postu Administrativu Uatulari, Manuel do Rosario lori Partidu FRETILIN nia naran hatoo sentidu kondelensia ba familia enlutada neebe saudoza husik hela iha mundu nee.
Iha biban nee Koordenador Partidu FRETILIN hatete saudozu nia luta iha ai laran hamutuk ho nia belun sira ho Partidu FRETILIN, husi sira nia luta mak ikus manan Bandeira Republika Demokratika Timor Leste.
“Uluk terus hamutuk luta ba indepedensia uza bandeira FRETILIN mak hodi luta, sira luta hodi bandeira FRETILIN luta hodi hetan bandeira Nasional, entau bandeira Nasional nee entrega ba Jerasaun Foun (Saudoza nia oan), no Bandeira FRETILIN entrega ba ami jerasaun tuan, (Saudoza Nia Kaben), karik imi lao ba iha neebe halo serbisu iha neebe keta haluha hau nia inan hela iha neebe? Hau nia aman hela iha neebe, hau nia inan terus oinsa, hau nia aman terus oinsa, reza nafatin ba sira,” katak nia.
Nunee mos Xefe Aldeia Wani Uma Suku Matahoi, Paulino Guterres Amaral neebe reprezenta Xefe Suku Matahoi lori autoridade nia naran hatoo sentidu kondelensia ba Familia enluta, iha biban nee autoridade lokal husu ukun nain sira tau matan ba faluk no oan kiak sira, tanba tuir autoridade lokal nia haree familia nee vuneravel liu.
“Karik nia dokumentus ruma mak seidauk kompleta karik hau nuudar reprezenta autoridade lokal nomos reprezenta Familia oan kiak husu atu trata saudoza nia dokumentus nee, nia lahetan osan ruma, maibe presiza hetan sertifikadu rekoinesementu ruma nunee oan no beioan sira ba eskola ruma pelumenus hanesan sinal ida hodi fo ba oan no beioan sira,” dehan Xefe Aldeia.
Tuir observasaun neebe STL hetan fatin refere antes halot saudoza, Sekretariu Zona Umu Sege, Tomas Soares da Silva entrega bandeira RDTL ba saudoza nia oan Mane boot, no Koordenador Partidu Fretilin Posto Administrativu Uatulari, Manuel do Rosario entrega bandeira FRETILIN ba Saudoza nia kaben.
(eme)
