DILI, STLTIMORLESTE.com – Polísia Nasional Timor-Leste (PNTL) kaer tan estranjeiru na’in 4 ba Scam Call Center iha Dili, maibé Governu kontinua nonok no husik rede kriminál buras iha nia oin.
Dili sai ona sidade seguru ba scammer sira. Iha Hotel Golgota, DSIK deskobre call center ilisit ne’ebé uza hodi bosok vitima iha rai li’ur liuhusi telefone no internet.
Aksaun ne’e hatudu servisu polísia nian, maibé hatudu mós frakeza estadu nian. Oinsá mak operasaun boot hanesan ne’e bele la’o livre iha kapitál laran?
Akademista UNTL, Daniel Xavier konsidera Timor-Leste hanesan uma ne’ebé odamatan nakloke, ema estranjeiru tama sai livre hodi halo krime.
“Hatene, maibé halo hanesan la hatene. Ne’e mak hahalok Estadu nian agora,” dehan Daniel ba STL, iha Kaikoli, Dili, Kinta (01/10/2016).
Tuir nia, Servisu Migrasaun no Ministériu Interiór laiha sistema kontrolu ne’ebé seriu. Ema tama ho visa turista, maibé hela hodi halo krime organizadu.
“Presiza kaer la’ós de’it ema na’in haat ne’e. Tenke kaer patraun boot, na’in ba otél, no ema ne’ebé fó visa mai sira,” dehan nia.
Iha parte ketak, Observador Francisco de Jesus, dehan imposivel Governu la hatene movimentu hanesan ne’e iha Dili laran.
“Hotel boot, ema estranjeiru tama sai loron kalan ho ekipamentu, internet la han. Imposivel polísia no komunidade la hatene,” hatete Francisco.
Nia alerta, imajen Timor-Leste estraga maka’as iha mundu internasionál.
“Investidór lejítimu sei ta’uk mai. Nasaun ne’ebé la konsege kontrola krime ki’ik iha nia oin, oinsá atu garante seguransa ba investimentu boot,”dehan nia.
Francisco afirna, povu hakarak justisa la’ós teatru. Kaer, hatudu iha media, depois husik sira selu multa no fila fali mai ho naran seluk.
Entretantu, antes ne’e Polísia Nasionál Timor-Leste (PNTL) liuhusi Diresaun Servisu Investigasaun Kriminál (DSIK) detein tan sidadaun Xineza na’in haat (4), ne’ebé deskonfia envolve iha atividade scam call center iha Hotel Golgota, Dili.
Autoridade seguransa konfiska evidénsia telemovel hamutuk 4 no osan kuantia US$4000 resin. Suspeitu na’in haat ne’e antes ne’e polísia detein ona ba kazu hanesan iha área Manleuana, maibé hetan kaptura hikas tan tanba deskonfia kontinua envolve iha rede krime transnasionál.
(car)
