DILI, STLTIMORLESTE.com – Sekretáriu Estadu Formasaun Profisionál no Empregu (SEFOPE), Rogério Araújo Mendonça rezeita akuzasaun kona-ba alegasaun katak instituisaun ne’e rekruta família sira husi Munisípiu Aileu ba servisu iha Austrália no Korea do Sul.
Rogério hateten, ida-ne’e ba jornalista sira iha Parlamentu Nasionál, hafoin partisipa iha audiénsia ho Komisaun D, ne’ebé trata asuntu ekonomia no dezenvolvimentu, deskuti kona-ba ezekusaun Orsamentu Jerál Estadu (OJE) 2026 no proposta orsamentu ba 2027.
Nia afirma katak, Governu tenke servisu ba povu tomak, la’ós atu fó prioridade ba partidu polítiku ka família ruma.
“Ita boot sira iha média bele ba entrevista ho ha’u-nia família rasik, atu haree família hirak-ne’ebé ba ona servisu,” Rogério dehan ba Jornálista sira iha Parlamentu Nasionál, Kinta (22/10/2026).
Nia mós afirma katak, durante hala’o knaar iha SEFOPE, nia servisu ho onestidade no fó oportunidade ba ema ne’ebé merese, la haree ba nia origem ka ligasaun família.
“Ha’u servisu ho onestidade. Ha’u hakarak hatete de’it katak ema ne’ebé merese mak hetan oportunidade,” nia enfatiza.
Rogério konsidera katak, fó oportunidade boot liu ba populasaun husi Aileu de’it sei la justu, tanba Governu iha responsabilidade atu atende sidadaun hotu-hotu ho igualdade.
Nia apela ba parte hotu atu servisu ho laran no responsabilidade ba nasaun, hodi respeita sakrifísiu ne’ebé povu Timoroan halo atu hetan independénsia.
Nia subliña katak, oportunidade empregu tenke bazeia ba meresimentu no justisa, la’ós ba interese pesoál ka família, atu garante sidadaun hotu-hotu iha asesu hanesan ba oportunidade servisu iha rai-laran no rai-li’ur.
(alb)
