DILI, STLTIMORLESTE.com – SEI no UNFPA hala’o formasaun atu hasa’e kapasidade funsionáriu kona-ba monitorizasaun violénsia bazeia ba jéneru iha Timor-Leste.
Diretur Jerál SEI, Armando da Costa hatete, atividade ne’e foka ba hametin sistema monitorizasaun, avaliasaun no jestaun dadus kona-ba violénsia bazeia ba jéneru.
Nia hatete, formasaun ne’e envolve funsionáriu SEI sira ne’ebé servisu iha área planeamentu, monitorizasaun no prevensaun violénsia bazeia ba jéneru.
“Objetivu formasaun ne’e mak hasa’e kapasidade no koñesimentu, oinsá jere informasaun, dadus no númeru sira ne’ebé ita hetan.”
Armando dehan, sistema monitorizasaun ne’e importante atu bele sukat progresu, atinjimentu no dezafiu sira iha implementasaun programa kona-ba violénsia bazeia ba jéneru.
Nia hatete, dadus no evidénsia ne’ebé hetan presiza organiza no relata ho sistema diak, atu bele hatudu área sira ne’ebé presiza atensaun.
“Hafoin loron rua liu, ita aprezenta relatóriu 2024 no 2025 ba Parlamentu Nasionál. Kada tinan, ita responde ba violénsia liu husi rihun ida,” dehan nia ba jornalista sira depois abertura formasaun durante loron rua nia laran iha Hotel Timor, Segunda (21/09/2026).
Tuir Armando, relatóriu no dadus sira bele sai baze ba Governu no Parlamentu Nasionál atu dezenvolve polítika, programa no orsamentu ne’ebé adekuadu.
Nia esplika katak, dadus ne’ebé produz iha nivel munisípiu mai husi pontu vokál SEI, MSSI, VPU no organizasaun sira ne’ebé servisu iha área ne’e.
Mekanizmu ne’e, nia hatete, parte husi rede referál ne’ebé liga instituisaun sira iha nivel nasionál no munisipál atu hametin koordenasaun.
Reprezentante UNFPA, Umbelina Rodrigues, hatete eliminasaun violénsia hasoru feto no labarik presiza sistema forte, rezultadu klaru no dadus konfiável.
“Bainhira ko’alia kona-ba hapara violénsia hasoru feto no labarik, ita ko’alia kona-ba proteje dignidade umana no transformasaun jéneru.”
Umbelina hatete UNFPA fó apoiu ba inisiativa ne’e bazeia ba kompromisu, apropriasaun nasionál no dezenvolvimentu kapasidade sustentável.
Nia hatete, SEI iha papel estratéjiku atu jere no koordena resposta multisetorial Timor-Leste ba violénsia bazeia ba jéneru.
UNFPA sei kontinua apoia SEI liuhusi ferramenta, koñesimentu tékniku no análize atu hametin parseria no sistema monitorizasaun.
Iha parte seluk, funsionáriu SEI, Mena da Silva hatete, formasaun ne’e importante tanba bele aumenta koñesimentu no kapasidade iha área monitorizasaun.
Nia liután dehan, kapasidade ne’e importante liuliu atu funsionáriu sira bele jere dadus no informasaun kona-ba violénsia bazeia ba jéneru.
(dom)
