DILI, STLTIMORLESTE.com – Sekretariu Estadu Komunikasaun Sosial (SEKOMS) asina Memorandum of Understanding (MOU) ho Sentru Audivisual Max Stahl Timor Leste (CAMSTL – sigla português), nunee bele transforma material video husi analog ba dijital.
“Akordu entre SEKOMS ho Sentru Audivizual Max Stahl nian atu oinsa bele transforma material video RTTL nian husi analog ba dijital, tanba durante tempu naruk RTTL nia kobertura ba iha 99 uluk kedan pois 2000, 2001, 2002 sei uza produtu ou kasetis sira neebe analok sei uza fita, atu bele sustentabilidade ba produtu sira nee presiza transforma husi analog ba dijital”, dehan SEKOMS, Expedito Dias Ximenes ba jornalista sira iha salaun DNAL SEKOMS, Tersa (12/04/2025).
Nia afirma, IX Governu Konstitusional liu husi SEKOMS servisu hamutuk ho Sentru Audivizual Max Stahl neebe iha aparelus ekipamentu neebe sofistikadu atu bele transforma produtu husi material kasete sira ba iha dijital.
“Ba Tatoli iha ona ninia produtu neebe dijital ona, maibe seidauk forma iha arkivu neebe dijital, arkivu neebe diak no dijitalizasaun neebe mak diak, tanba nee mak iha nota entendimentu neebe ohin ami asina nee atu fo kompetensia ba iha Sentru Audivizual Max Stahl depois hamutuk ho RTTL no Tatoli halo espesie kontratu entre sira nain tolu,” tenik nian.
Nia haktuir, akordu agora nee ba tinan ida nian, depois tinan ida prosesu nee lao karik nafatin tinan oin bele kontinua, maibe akordu ida nee dehan katak nota entendimentu MoU em geral depois RTTL ho Tatoli se halo fali hanesan espesial kontratu ho Sentru Audivizual Max Stahl.
Nunee Sentru Audivisual Max Stahl iha duni nian perfil ekipamentus neebe mak diak, tanba nee Estadu TL rekonhese hanesan Sentru Audivizual neebe prezerva produtus kobertura istoriku neebe durante nee RTTL no media tomak halo.
“Agora Governu sei update hela ba media Estatal ba RTTL ho Tatoli, iha tempu oin ita mos sei halo ba media hotu-hotu,” katak nia.
Nia tenik, osan tuir alokasaun iha orsamentu Estadu iha US$ 150 mil, maibe iha osan nee depois kontratu nain rua entre sira sei haree oinsa alokasaun ba iha interese neebe sira nain rua atu halo.
“Osan alokasaun mak ida nee, maibe depois bele menus ou bele liu depende, oinsa mak alokasaun bele Orsamentu Jeral Estadu nee US$ 150 mill maibe alokasaun ba ida nee karik too deit iha US$ 120 mil,” katak nian.
Iha fatin hanesan, Diretor Ezekutivu Sentru Audivisual Max Stahl Timor Leste ( CAMSTL), Eulisitio Pinto hatete, loron ohin importante tebes hamutuk ho SEKOMS neebe iha estratejiku korisaun tebes-tebes ba prezervasaun no konserva materia sira neebe hanesan patrimóniu nasaun TL.
“Entaun servisu neebe mak agora ita hakarak halo mak presiza identifika materia neebe iha RTTL.EP, neebe kasete analog sira iha barak, entaun presiza halo jestaun, tanba inundasaun mos impaktu ba materia sira nee, nomos banhira sira halo gosepsaun mudansa fatin sira nee hotu impaktu ba rai rahun hodi bele estraga fali ita nian materia produtu jornalista sira nian,” katak nia.
(EST 2)
