DILI, STLTIMORLESTE.com – Sekretariu Estadu Komunikasaun Sosial (SEKOMS) fo formasaun ba Ofisial Media sira iha Timor Leste (TL), oinsa bele hakerek imprensa neebe loos no kredivel ba publiku.
“Ita realiza formasaun ba ofisial media sira iha Timor Leste, ho objetivu ida atu oinsa sira bele hakerek imprensa ho atraktivu ba publiku atu haree no lee informasaun ministerial ka Governu nian, entaun formasaun nee atu fo hanorin ba ofisial media sira atu hakerek tuir etika kode jornalizmu neebe iha,” dehan Diretor Jeral SEKOMS, Florindo da Costa ba jornalista sira iha MNEK, Pantai Kelapa, Dili, Kuarta (04/11/2024).
Formasaun nee tuir nia hanorin ba Ofisial Media sira durante loron tolu (3), nee atu mentoriza diak ba sira, hodi hakerek informasaun ministerial ka orgaun Governu nian ho diak, tuir etika jornalizmu neebe iha, no atualiza informasaun ka programa ministeriu nian neebe diak ba publiku, katak saida mak ministeriu nia servisu durante nee.
Objetividade sira nee mak hodi realiza formasaun ba media odisial sira, atu sira entende diak prosesu oinsa hakerek emprime, tanba servisu ministerial nee importante tebes atu hakerek, nunee publiku bele hatene nia servisu sira durante sei iha mandatu.
Iha fatin hanesan, Ofisial Media iha Sekretariu Estadu Agua no Saneamentu (SEAS), Veronica Oliveira Ximenes dehan, formasaun nee importante tebes ba ema Ofisial Media sira iha Timor Leste, tanba bele hanorin dalan oinsa hakerek emprime, nunee bele hakerek informasaun ministerial ka Governu nian ho los no kredivel.
Tanba informa neebe mak kada media ofisial sira publika nee, tanba bazeia ba servisu ministeriu nian, nunee presiza hakerek diak, tuir dalan ka kodigu etika jornalizmu nian, hodi publiku hatene katak ministeriu nia servisu durante nee lao ho diak.
Entretantu Media Ofisial husi Ministeriu Juventude Desportu Arte no Kultura (MJDAK), José Antonio Carvailho Martins afirma, formasaun ida nee fiar katak lao ho diak, depende ba sekuensia sira neebe formador sira fo oinsa bele eduka liu tan informasaun ministeriu nian ho diak.
Tanba nee espera formasaun neebe realiza husi SEKOMS sei mentoriza nafatin ba ema ho ofisial media sira, oinsa bele dezenvolve informasaun ministeriu idak-idak nian ho diak, hodi publiku bele entende katak, servisu Governu nian durante nee lao ho diak.
(EST 1)
