BAUCAU, STLTIMORLESTE.com — Sekretáriu Estadu Komunikasaun Sosial (SEKOMS) lansa plataforma Suku Dijital no Sentru Formasaun Suku iha Uma Ana Ulo, Postu Administrativu Venilale, Munisípiu Baucau, Sabadu (19/09/2026), hodi fasilita asesu informasaun komunidade.
Sekretáriu Estadu Komunikasaun Sosial (SEKOMS), Expedito Loro Dias Ximenes hatete, programa Suku Dijital parte hosi asaun IX Governu Konstitusionál atu hakbesik asesu internet no informasaun ba komunidade iha suku sira.
Nia hato’o deklarasaun ne’e ba jornalista sira iha Sede Suku Uma Ana Ulo, Sabadu, depois lansa plataforma Suku Dijital iha suku ne’e.
Serimónia lansamentu partisipa hosi Jestor Postu Administrativu Venilale, José Freitas Boavida, Xefe Suku Uma Ana Ulo, Narcisco da Costa Belo, lia-na’in, veteranu, juventude no komunidade lokal.
Atividade hahú ho simu ekipa SEKOMS, lia-na’in kultura Venilale, dansa rinha hosi estudante Eskola Básika Filial Bercoli Venilale, tara tais no atividade lansamentu.
SEKOMS Planeia 100 Suku Dijital
Expedito hatete katak SEKOMS hala’o ona formasaun ba juventude sira no fó sertifikadu antes lansamentu Suku Dijital.
Tuir nia, SEKOMS liuhusi programa ne’e já halo lansamentu iha Suku Dijital 50 iha territóriu Timor-Leste no planeia to’o 100 sede suku antes mandatu IX Governu Konstitusionál remata.
“Molok lansa Suku Dijital nee, SEKOMS halao uluk ona formasaun lubuk ida ba joventude sira no simu sertifikad,” dehan Expedito.
Nia hatete programa ne’e hala’o hamutuk ho Ministériu Transportes no Komunikasaun (MTK) no Ministériu Administrasaun Estatál (MAE), atu komunidade iha suku sira bele asesu internet no informasaun hosi website.
Tuir Expedito, Starlink no fibra ótika sei ajuda fasilita asesu komunidade ba informasaun kona-ba progresu no servisu governu, inklui informasaun hosi munisípiu sira no mundu tomak.
Rádio Komunidade Sei Kontinua
Alende Suku Dijital, Expedito hatete governu sei kontinua dezenvolve rádio komunidade tanba meiu ne’e konsidera importante atu lori informasaun ba komunidade iha suku sira.
Nia hatete katak Timor-Leste iha ona rádio komunidade 22, no iha tempu badak sei lansa rádio komunidade iha Atsabe, Raimea no Baguia.
Venilale Agradese Programa Dijital
Jestor Postu Administrativu Venilale, José Freitas Boavida, hato’o agradesimentu ba IX Governu Konstitusionál no SEKOMS tanba lori programa Suku Dijital ba Suku Uma Ana Ulo.
Nia konsidera programa ne’e nu’udar pasu foun atu hakbesik teknolojia no informasaun ba povu Venilale, liuliu tanba Timor-Leste tama ona iha Países de Língua Portuguesa no ASEAN.
Xefe Suku Uma Ana Ulo, Narcisco da Costa Belo, mos agradese ba governu tanba lansa Suku Dijital iha sira nia suku, atu fasilita komunidade asesu informasaun kona-ba dezenvolvimentu iha rai-laran no rai-liur.
Eskola Husu Dijitalizasaun
Bernabe da Costa Sarmento, hosi Eskola Sekundária Jerál Públiku Venilale-Filial Bercoli, husu ba governu atu apoia no dijitaliza eskola, hodi estudante no profesór sira bele asesu informasaun.
Hatan ba pedidu ne’e, Expedito Loro Dias Ximenes hatete katak governu sei konsidera nesesidade sira tuir kapasidade orsamentu ne’ebé iha.
Serimónia lansamentu Suku Dijital iha Uma Ana Ulo remata ho ko’a kek no toos sampanha.
(jos)
