DILI, STLTIMORLESTE.com — Sekretariu Estadu Kooperativa (SEKoop) prepara konferensia regional, dialogu ministerial no Expo Kooperativu ASEAN 2026, ne’ebé sei halao iha Outubru nee.
SEKoop realiza enkontru ho parseiru no ajénsia dezenvolvimentu sira, atu koordena preparasaun ba Dili Regional Cooperative Conference, Ministerial Dialogue no Expo Kooperativu ASEAN 2026.
Sekretáriu Estadu Kooperativas, Arsenio Pereira da Silva, hatete katak enkontru ho parseiru sira ne’e normalmente halao kada trimestre, maibé enkontru ba dala lima ne’e fó atensaun espesífika ba preparasaun eventu kooperativa ne’ebé sei halao hosi 1 to’o 4 Outubru.
“Ohin ne’e espesial oituan. Baibain ami halo enkontru rotativu ho parseiru balun ne’ebé prontu organiza sira nia servisu. Maibé enkontru dala lima ne’e fó fokus liu ba preparasaun ita nia Dili Regional Cooperative Conference no Ministerial Dialogue,” dehan Arsenio ba jornalista sira iha salaun Coreios, Mascarinhas, Kinta (27/08/2026).
Nia hatete katak SEKoop husu kontribuisaun, hanoin no partisipasaun hosi parseiru sira atu asegura eventu ne’e lao di’ak. Parseiru sira sei partisipa iha konferensia no expo, inklui liu hosi aprezentasaun no exibisaun produtu kooperativa.
Arsenio dehan konferensia ne’e sei la’ós deit fó oportunidade ba nasaun seluk fahe esperiénsia, maibé Timor-Leste mos sei aprezenta esperiénsia no aprende buat foun hosi nasaun membru ASEAN sira.
Nia hatutan katak iha loron 7, SEKoop sei halao konferénsia imprensa atu aprezenta preparasaun kompletu ba eventu. Preparasaun ne’e, ne’ebé hahú ona hosi tinan kotuk, to’o agora atinji besik 75%.
Konferensia sei envolve membru ASEAN tomak no konvida panelista balun atu fahe esperiénsia kona-ba dezenvolvimentu kooperativa.
Enkuantu, staff hosi Kooperativa CC Hadama Ainaro, Marsal Mendonca, hatete katak sira partisipa iha enkontru atu aprezenta preparasaun no apoiu kooperativa ba expo. Kooperativa sei lori produtu hanesan ropolhu, ai-fuan strawberry no senora.
Nia hatete Kooperativa Munisípiu Ainaro sei fó apoiu ba produtu potensial hosi munisípiu, inklui lis tahan bombai, hodi promove kresimentu kooperativa no asesu ba merkadu.
“Liu hosi expo ne’e bele hasae liután produtu hirak ne’ebé hosi to’os-na’in sira presiza dezenvolve, no oinsá sira bele asesu ba supermerkadu sira iha rai laran,” dehan Marsal.
Marsal konsidera, expo importante tanba kooperativa rasik bele promove produtu diretamente. Kooperativa ne’e iha membru liu 20 no to’os-na’in liu 100, ho maioria membru feto.
Iha parte seluk, Manajer Projetu Haforsa hosi CARE, Yoko Ito, hatete katak sira partisipa iha enkontru atu rona ideia no esperiénsia hosi parseiru sira seluk, ne’ebé bele implementa ba grupu komunidade iha Postu Administrativu Atsabe, Munisípiu Ermera.
Maski grupu sira ne’e seidauk forma kooperativa, Yoko dehan sira iha planu atu lori produtu hosi Atsabe, hanesan tais, produtu agrikultura no hortikultura, ba expo.
Agora daudaun, Haforsa kria ona grupu komunidade haat hosi suku haat iha Atsabe, ho membru hamutuk 118, kompostu hosi feto 77 no mane 41.
Grupu sira ne’e halao atividade hanesan rai no empresta osan, kuda no fa’an modo, jere negósiu ki’ik hanesan kios, produz no fa’an tais, hakiak animál no atividade ekonómika seluk.
(dom)
