DILI, STLTIMORLESTE.com – Servisu Edukasaun Munisipiu (SEM) Ainaro nafatin halo koordenasaun servisu ho parte dirijente husi eskola ida-idak.
Lia hitak nee hatoo husi Diretor Servisu Edukasaun Munisipiu Ainaro, Patricio da Costa Magno katak, durante nee SEM halo koordenasaun servisu neebe mak diak ho direjente husi eskola neebe daudaun nee lokaliza iha Munisipiu Ainaro, tanba liu husi koordenasaun servisu ida nee bele fo informasaun konaba dezafiu saida deit mak eskola sira infrenta.
“Durante nee mak koordena malu ho ita nian direjente husi eskola sira, oinsa ami informa ba malu konaba ita nian eskola sira nee, difikuldade saida eskola sira infrenta, depois ami hatoo ba parte nasional, atu nunee bele fo resposta, liga ba fasilidade eskola nian, kondisaun eskola, implementasaun programa merenda eskolar no seluk tan,” dehan Patricio ba STL liu husi telefone, Sesta nee (24/07/2026).
Nia dehan, nuudar Diretor Servisu Edukasaun Ainaro nian sempre halo koordenasaun servisu ho parte relevantes hotu, liu-liu koalia konaba asuntu edukasaun nian, konaba direjente eskola nian nee, koordena servisu neebe mak importante tebes, ho nunee husi Edukasaun Munisipiu bele hatoo fali ba iha parte nasional.
“Hau hanoin durante nee, dala ruma ita nian dirijente husi eskola sira, bainhira iha asuntu ruma sira bele hatoo mai ami, nunee ita bele solusiona, nunee ami nian koordenasaun servisu lao diak hela, ami koordena ho ita nian dirijente husi Edukasaun pre eskolar, ensinu baziku, sekundariu no tekniku vokasional,” nia informa.
(jac)
