FATUMEA, STLTIMORLESTE.com — Folin sementi marka Tonasa iha Postu Administrativu Fatumea, Munisípiu Covalima saku ida folin US$ 9.00.
Nain Loja Jumajen, Julito Amaral, hateten sosa sementi Tonasa iha Suai kada saku ho folin entre US$7.00 to’o US$7,50 no faan iha Fatumea tenke aplika folin US$ 9.00, tanba inklui kustu transporte no kondisaun estrada Salele-Fatumea aat inklui folin kombustivel.
“Ami fa’an hanesan nee tanba kondisaun estrada la diak. Ami mos aluga kareta mak tula mai. Ami tenke sura ba kareta US$ 1.00, ami hetan US$0,50,” hateten Julito ba STL iha Fatumea, Kuarta (07/10/2026).
Julito hateten, nia lori sementi Tonasa husi Suai ba Fatumea iha loron 24 Setembru 2026 ho total saku 60.
Maibé to’o agora, folin ne’ebé aas halo konsumidór sira la iha interese atu sosa.
“Hau ba sosa iha Suai lori mai nee iha Setembru, loron 24, lori mai maibé to’o agora saku ida deit mos ema la sosa tanba sementi karun liu,” Julito komfesa
Nia katak, folin sementi atual la’os afeta deit ba konsumidór konstrusaun privadu sira, maibé afeta mós ba loja faan sementi, tanba sosa ho folin karun, maibé faan ema la sosa.
“Ita sente triste tanba ita lori mai, ema la sosa. Ami nia osan inan mate hela iha laran,” Julito espresa
(tom)
