DILI, STLTIMORLESTE.com – Jurista Timor oan konsidera katak, importante duni harii sentru juvenil, hodi asegura direitu minoridade nian.
“Hau nia hanoin importante para governu estabelese sentru juvenil, para asegura direitu minoridade sira nee, tanba wainhira minoridade mak pratika krime ruma sira labele kastigu hamutuk ho ema boot iha prizaun,” dehan Jurista Sergio Dias Quintas ba STL iha Kaikoli, (01/06/2026).
Nia esplika, harii Sentru Juvenil laos tanba razaun sira ida sei kiik husik deit sira livre lae, maibe wainhira iha ona sentru juvenil sei akomoda sira iha neeba, hodi eduka sira, portantu sentru juvenil nee importante ba vida moris joven minoridade neebe pratika krime.
Iha fatin ketak, Akademiku UNTL, Rafael de Jesus dehan, importante duni hari sentru juvenil, tanba ohin loron dadur juvenil sira sei tau hamutuk ho dadur neebe idade avansadu.
“Hanoin importante duni harii sentru juvenil, tanba ohin loron seidauk iha sentru juvenil, dadur sira neebe idade juven sei tau hamutuk ho dadur sira neebe indultu,” dehan nia.
Nia hatutan, se planu governu nian harii sentru juvenil, ida nee sai hanesan pasu importante ida atu bele separa entre dadur neebe idade juvenil no dadur neebe idade boot.
Nia dehan, dadur juvenil tenke tau sira ketak, ho formasaun ba sira ketak atu sira sai husi fatin neeba bele halo mudansa ba sira nia aktu.
Aleinde nee, Ministru Justisa, Sergio Hornai deklara katak, tuir planu sentru juvenil sei harii iha Tibar, no oras nee daudaun iha ona faze preparasaun.
(ter)
