DILI, STLTIMORLESTE.com – Sentru Saude Munísipiu Ainaro halo atendimentu mensal liu ema rihun 4 too 6, hatudu katak sentru ida nee dezempenha papel importante tebes ba saude komunidade Ainaro nian.
Liafuan nee haktuir husi Visi Ministru Fortalesimentu Institusional Saude, José dos Reis Magno iha ambitu halo inagurasaun ba morru protesaun haleu Sentru Saude Internamentu Ainaro, iha loron 7 Maiu 2026.
Iha diskursu Ministru nee katak, Sentru Saude Internamentu Ainaro no rede servisu saude iha Postu Administrativu Ainaro Villa atualmente fo kobertura ba populasaun hamutuk ema rihun 22.430 neebe distribui iha suku 7 no aldeia 32. Loroloron no fulan-fulan, fasilidade saude sira iha area ida nee simu numeru pasiente neebe aas tebtebes, dadus operasional hatudu katak iha 2025 deit, servisu OPD ka konsultasaun ambulatoriu iha area Ainaro hetan alvu atendimentu liu husi ema rihun 231 durante tinan ida. Iha Sentru Saude Ainaro rasik, atendimentu mensal liu ema rihun 4 too 6.
“Ida nee hatudu katak sentru ida nee desempenha papel importante tebes ba saude komunidade Ainaro nian, servisu saude sira neebe disponivel iha sentru ida nee inklui, konsultasaun jeral , saude inan no labarik, vaksina, nutrisaun, planeamentu familiar, tratamentu moras transmisível no la transmissível, no servisu internamentu ba pasiente sira neebe presiza observasaun no kuidadu kontinua,” dehan Visi Ministru nee liu husi pajina MS neebe STL asesu Segunda (11/05/2026).
Nia katak, atualmente fasilidade saude sira iha area nee apoiadu husi profisional saude hamutuk ema 82, inklui mediku, enfermeiru, parteira, analis¬ta laboratóriu, farmasista, radiolojista, fisioterapeuta, saude oral no pesoal apoiu administrativu sira, sira hotu servisu ho dedikasaun boot atu garante populasaun hetan atendimentu saude neebe diak.
Antes konstrusaun moru ida nee, Sentru Saude hasoru dezafiu lubuk ida. Área sentru nian la iha protesaun adekuadu, ema no animal bele tama livremente, no ida nee hamosu risku ba seguransa instalasaun, ekipamentu no medikamentu sira. Iha mos preokupasaun kona-ba vandalizmu, falta privasidade ba pasiente sira no difikuldade atu kontrola movimentasaun iha area hospital nian. Tanba nee, investimentu ida nee importante tebes atu responde ba nesesidade real iha terenu sira hanesan temi, ho konstrusaun muru haleu ida nee.
“Ita hein katak, seguransa ba profisional saude no utente sira sei diak liutan, ekipamentu no patrimoniu estadu sei protejidu diak liu, organizasaun espasu físiku sei melhora, no ambiente servisu sei sai dignu, seguru no apropriadu liutan atu fo atendimentu saude ho kualidade,” tenik nia.
Tanba nee, Governu liuhusi Ministeriu Saude kontinua komprometidu atu hametin kuidadu saude primaria, aumenta investimentu iha infraestrutura saude no garante katak servisu saude too ba komunidade hotu-hotu, inklui iha area remota sira. Projetu ida nee mos alinha ho Planu Estratejiku Nasional Saude no prioridade Governu nian atu promove sistema saude ida neebe forte, inkluzivu no reziliente.
“Hau hakarak enfatiza katak infraestrutura diak sei la iha signifikadu se la akompaña ho servisu neebe ho kualidade, jestaun neebe diak no kompromisu husi ema hotu, tanba nee hau enkoraja profisional saude sira atu kontinua servisu ho espíritu, humanidade no responsabilidade, atu remata hau reafirma katak Governu sei kontinua investe iha setor saude atu garante katak povu Timor-Leste, inklui komunidade Ainaro nian, bele asesu ba kuidadu saude neebe seguru, dignu ho kualidade.
Servisu saude sira neebe disponivel iha sentru ida nee inklui, konsultasaun jeral ,saude inan no labarik, vaksina, nutrisaun, planeamentu familiar, tratamentu moras transmisível no la transmissível, no servisu internamentu ba pasiente sira neebe presiza observasaun no kuidadu kontinua.
Nia hatutan, sente onra boot no haksolok bele marka prezensa iha serimonia importante ida nee, atu hamutuk inagura ofisialmente projetu konstrusaun muru haleu ba Sentru Saude Internamentu Ainaro/Hospital Ainaro iha Maulo-Builico.
Lori MS no IX Governu nia naran, hatoo agradesimentu ba parte hotu neebe kontribui ba realizasaun projetu ida nee, liuliu ba kompanhia Reza Unipessoal, Lda, autoridade lokal sira, ekipa teknika no komunidade sira neebe fo apoiu durante implementasaun obra ida nee.
Projetu ida nee finansia husi OJE ho montante total US$ 135.114,78, neebe hahu implementa iha loron 2 fulan Maiu de 2025 no remata tuir planu iha Marsu de 2026.
Muru ida nee reprezenta seguransa, dignidade no responsabilidade Governu nian atu proteje infraestrutura saude, profisionál saude sira no komunidade neebe mai halo atendimentu iha fatin ida nee.
(dom)
