DILI, STLTIMORLESTE.com – Iha fulan Outubru fulan kotuk Servisu Saude Munisipiu Dili (SSMD) rejistu moras infesaun Vias Respiratória Aguda (ISPA – sigla Indonezia) Hamutuk 12.253.
“Husi fulan Outubru ita rejista moras neebe aas iha kada sentru saude sira iha Dili laran mak moras ISPA hamutuk 12.253, tuir mak moras kulit seluk hamutuk 2.435, teben ho raan hamutuk 1.805 no moras Pneumonia hamutuk 664,” hatete Diretor Servisu Saude MunisÍpiu Dili (SSMD), Mateus Pinto ba jornalista sira iha nia knaar fatin SSMD, Formoza, Dili, Sesta (29/11/2024).
Tuir nia, kada tinan moras ISPA kontinua aumenta, tanba situasaun klimatika udan tiha depois para, entaun halo rai rahun makaas hodi afeta ba moras ida nee.
Tanba nee atu halo prevensaun ba moras nee mak tenke lao sai uza maskara no fase hahan sira halo moos no haree didiak hahan sira neebe mak faan iha dalan ninin, dala ruma rai rahun kaer metin, maibe ita la hatene sosa depois han, entaun ida nee mak halo moras no mos bainhira atu han la fase liman han deit, ida nee mos prejudika ba moras sira nee.
Nia husu ba komunidade idak-idak oinsa bele hatene atu halo prevensaun ba sira nia aan nunee hadook aan husi moras sira nee.
Iha fatin ketak, Pasiente Francisco do Carmo Silva hatete, tratamentu iha Sentru Saúde Formosa lao diak, no liu-liu moras ISPA neebe rejistu aas, tanba tempu udan monu rai no rai rahun agora iha fatin-fatin.
(jen)
