MATEBIAN, STLTIMORLESTE.com — Sentru Saúde foun iha Postu Administrativu Matebian, Munisípiu Baucau, ne’ebé Governu foin inagura, seidauk funsiona ho kapasidade tuir estatutu Sentru Saúde tanba sei menus fasilidade.
Xefe Suku Maluru, Nuno Florindo, hateten katak komunidade preokupa ho kondisaun Sentru Saúde ne’e, liuliu kona-ba fasilidade iha laran edifísiu ne’ebé konsidera seidauk sufisiente atu apoia atendimentu saúde.
Nia fó ezemplu katak iha fulan Maiu, estudante ida monu no lori ba Sentru Saúde refere atu hetan asisténsia husi pesoál saúde. Maibé, iha momentu ne’ebá, komunidade haree katak fasilidade disponível seidauk natoon.
“Fasilidade uma ne’e foun, maibé haree fasilidade saúde iha uma laran la sufisiente, liuliu kama no kadeira atu apoiu Sentru Saúde ne’e. Enome Sentru Saúde,” hateten Nuno Florindo ba STL iha Matebian, Segunda (28/09/2026).
Nuno hateten katak, estabelesimentu Sentru Saúde presiza kompleta ho fasilidade no rekursu ne’ebé sufisiente, inklui ekipamentu médiku no transporte hanesan kareta multi-funsaun atu apoia transporte pasiente ba unidade saúde referál, inklui Hospitál Rejionál no Nasionál bainhira presiza.
Nia mós hateten katak, hafoin Governu liuhusi Ministériu Saúde inagura Sentru Saúde ne’e, ekipamentu, transporte no aimoruk seidauk kompleta.
“Hanesan labarik sira moras, lori ba aimoruk mós menus. Tanba ida ne’e, ita ezije nafatin Governu atu apoiu tuir estatutu Sentru Saúde nian, tanba ida ne’e importante tebes,” Nuno rekomenda.
Iha sorin seluk, Xefe Sentru Saúde Quelicai, Domingos Boavida, konfirma katak Sentru Saúde Matebian inagura ona diretamente husi Ministra Saúde iha fulan hirak liubá.
Maibé, tuir nia, unidade refere seidauk funsiona ho estatutu kompletu hanesan Sentru Saúde, tanba sei hein diploma ministeriál husi Ministériu Saúde atu determina no formaliza nia funsionamentu.
“Nia funsionamentu hanesan Sentru Saúde seidauk, tanba rekursu umanu, inklui Xefe Sentru Saúde, seidauk iha nomeasaun. Kareta multi-funsaun mós seidauk iha, no sei falta rekursu seluk atu kompleta servisu sira ne’ebé instala iha Sentru Saúde,” Domingos hateten.
Domingos esplika katak iha diferensa entre Postu Saúde no Sentru Saúde. Postu Saúde normalmente iha fasilidade no atendimentu limitadu, enkuantu Sentru Saúde tenke bele hala’o programa no servisu saúde ne’ebé luan liután.
Tuir nia, Sentru Saúde tenke iha kapasidade atu implementa programa 28, ne’ebé kada programa presiza rekursu umanu no responsabilidade espesífiku.
Nune’e, maski Sentru Saúde Matebian inagura ona, programa 28 seidauk estabelese ho kompletu tanba rekursu umanu seidauk priense. Atualmente, pesoál saúde ne’ebé destaka iha unidade foun ne’e hamutuk na’in 6 de’it, inklui médiku na’in ida.
“Iha Sentru Saúde ida, médiku pelu menus na’in haat, nune’e atendimentu bele di’ak. Parteira ka pesoál saúde tenke na’in lima ba leten. Maibé atual kestaun rekursu ita seidauk priense,” Domingos komenta.
Husu MS Priense Rekursu
Xefe Sentru Saúde Quelicai husu Ministériu Saúde atu halo rekrutamentu no destakamentu médiku, parteira no pesoál saúde ba Sentru Saúde Matebian.
Tuir nia, reforsu rekursu umanu, ekipamentu, aimoruk no transporte importante atu unidade saúde ne’e bele kumpre atribuisaun tuir estatutu Sentru Saúde no fó atendimentu saúde ne’ebé adekuadu ba komunidade iha Postu Administrativu Matebian.
(tom)
