DILI, STLTIMORLESTE.com – Servisu Edukasaun Munisipiu Ainaro hatama ona lista profesores iha area remotas neebe seidauk hetan sira nian direitu ba osan area remotas ninia.
“Kona-ba ita nian profesores neebe hanorin iha area remotas sira nee, lista ida ita haruka ona ba iha Ministériu Edukasaun liu husi Rekursu Umanu, ita haruka lista sira nee ba iha nee ba, ita identifika profesores iha area remotas no estradamentu de motas, depois husi rekursu umanus mak sei haree ida nee, dadus ema nian naran kompletu ita haruka ona ba ME, tanba tuir lei sira neebe iha area remotas nee hetan osan area remotas nian, atu nunee husi Rekursu Umanu bele haree se mak iha area remotas nee bele rezolve,” afirma Direitor Servisu Edukasaun Munisípiu Ainaro, Patricio da Costa Magno ba STL liu husi telefone, Kinta nee (21/05/2026).
Nia dehan, sira nian parte dadus identifika hotu no haruka ona ba iha ME nasional, agora ida nee hein rekursu umanu mak sei rezolve, profesores neebe mak sira identifika iha area remotas nee profesores neebe tama iha lista area remotas hamutuk 315, nee hatama ona ba iha ministériu.
“Lista nee konaba profesores iha area remotas nian, atu nunee ita nian rekursu umanus mak bele rezolve osan area remotas nian, osan ida nee depende fali ba iha profesores sira nian distansia nee, area remotas no estradamentu de motas nee husi Rekursu Umanu hatene liu, maibe ida nee aumenta ho sira nian salariu baziku, pedidu nee ami hatama iha tinan ida nee nia laran,” nia esplika.
Bainhira STL tenta atu halo kofirmasaun ho Diretor Rekursu Umanu Nasional iha ME, Joao Amaral, maibe la konsege tanba okupadu ho servisu.
(jac)
