BAUKAU, STLTIMORLESTE.com – Diresaun Servisu Kultura Munisipiu Baukau simu pedidu husi uma lisan hamutuk 14 neebe hetan estragus husi natureza.
Responsavel Diresaun Servisu Kultura Munisipiu Baukau, Avelino Gaio esplika, husi pedidu 14, uma lisan 13 afeta husi insendiu, 12 rejistu iha Aldeia Maukale, Suku Gariuia, Postu Administrativu Baukau Vila inklui uma lisan ida iha Aldeia Gugulai, Suku Uaitame, Postu Kelikai Antigu, nomos ida hetan estragus husi anin, iha Aldeia Uligata, Suku Afasa, Postu Kelikai Antigu.
“Sira nia proposta mai hotu ona iha nee, ami halo aprovasaun nain rasik lori ba direiramente ba iha nasional,” hateten Avelino ba STL iha knaar fatin Vila Nova, Tersa (08/04/2025).
Nia sublina, diresaun servisu kultura Baukau simu proposta husi uma lisan 14 iha tinan 2024 no halo aseitasaun ba kada uma lisan neebe aprezenta nain ba uma lisan sira direita ba iha nasional, tanba tuir planu sei fo apoiu finanseiru hodi konstrui hikas uma lisan neebe hetan estragus.
Nia argumentu, ekipa nasional daudaun sei halo natasaun no sei haruka rezultadu ba diresaun servisu kultura Baukau hafoin koordena ho Autoridade Suku hodi orienta benefisiariu loke konta bankaria hafoin prosesu orsamentu liu husi banku sira neebe indika.
Avelino akresenta, proposta husi uma lisan 14, kada uma lisan sei hetan apoiu fundu husi Governu besik rihun US$ 5 tuir regulamentu neebe estabelesidu, tanba apoiu refere atu estabelese hikas uma lisan neebe hetan estragus husi natureza.
Enkuantu Estadu Timor Leste apoiu orsamentu ba konstrusaun uma lisan sira neebe hetan estragus, tanba previstu iha Konstituisaun Republika Demokratika Timor Leste no protesaun legal, prezervasaun, defeza no valorizasaun patrimoniu kultura Timoroan sira nian, Governu hatuur ona rejime juridiku patrimoniu kultura liu husi Dekretu lei nu. 33/2017, 6 Setembru.
(tom)
