DILI, STLTIMORLESTE.com – Ambiente laran susar no silensiu nakonu rezidensia Antigu Prezidente Republika no atual Prezidente Partidu FRETILIN, Saudozu Francisco Guterres Lu Olo. Ohin sidadaun lubun boot husi parte oin-oin mai vizita fatin nee, hodi fo respeitu ikus ba figura istorika nasaun nian nee.
Sira neebe mai kompostu husi lideransa politika, veteranu, joven sira too sidadaun ordináriu. Hotu hotu hatudu sira nia dedikasaun no sentimentu triste, tanba lakon figura ida neebe iha kontribuisaun boot ba luta libertasaun nasional no konstrusaun estadu Timor-Leste nian.
Tuir observasaun jornalista STL iha terrenu, povu husi nível oioin ho pasiensia iha lina naruk bele tama ba laran no fo respeitu ikus ba Saudozu Lu Olo. Iha fatin simu vizitante, sentimentu laran susar no silensiu nakonu, ho familia sira neebe simu vizita husi maluk povu sira ho laran diak maski iha momentu difisil nee.
Vizitante neebe mai husi fatin oioin hatoo katak, motivasaun boot sira mai tanba konsideira saudozu Lu Olo nuudar aman ida neebe hatene rona povu.
“Ami lakon lider ida neebe haraik aan no besik ba povu.Nia laos deit lider partidu nian, maibe nia mos figura ida neebe nuudar simblu unidade iha tempu neebe difisil,” hatete sidadaun Manuel de Araújo, neebe mai fo respeitu ikus ba Saudozu Lu Olo iha ninia rezidensia, Farol, Díli, Kinta (25/06/2026).
Maski ema lubun boot mai ho numeru neebe boot, maibe prosesu vizita ba rezidensia lao ho kalma no organizadu. Polisia Nasional Timor Leste hamutuk ho ekipa seguransa partidu nian halao sira nia knaar hodi kontrola movimentu ema nian no garante katak serimonia lao ho dignidade.
Too oras nee vizita husi publiku sei kontinua aumenta.Governu no Partidu FRETILIN mos prepara hela preparasaun sira hodi lori saudozu ba fatin deskansu ikus tuir protokolu estadu nian neebe sei fo sai iha tempu badak.
(car)
