DILI, STLTIMORLESTE.com – Sidadaun Xineza uza bandeira Indonezia ho Roo Famara Jaya Utama lori sigarru ilegal tama mai Timor Leste (TL), tanba nee Polisia Nasional Timor Leste (PNTL) liu husi Diresaun Servisu Investigasaun Kriminal (DSIK) hamutuk Unidade Polisia Maritima (UPM) hodi prende sigaru ilegal konteiner ida resin.
Observasaun STL iha terenu katak, roo ilegal ida ho naran Famara Jaya Utama uza bandeira Indonezia neebe sidadaun Xineza mak lori hodi atraka iha Portu Dili, maizumenus tuku 12:00, Segunda nee (27/07/2026) lori tama sigarru ilegal hamutuk kontainer ida resin neebe PNTL liu husi DSIK hamutuk UPM nomos intelijensia sira hodi prende.
Tuir fontes konfirmadu hatete, roo ho naran Famara Jaya Utama ho baindeira Indonezia neebe hamriik iha roo leten nakonu ho sigaru ilegal ho marka C15, C14, C11, C29, C17, C26, C12, E8, C24, no daudaun nee UMP ho Komponente Naval Forsa Defeza Timor Leste (F-FDTL), Servisu Migrasaun nomos ekipa sira seluk hatun ona sigaru ilegal nee.
“Ita haree roo nee bandeira Indonezia mak hamriik iha leten, maibe iha laran nee sidadaun Xineza mak barak liu, no roo laran nee sigaru ilegal besik kontainer ida resin mak iha laran,” hatete fontes konfirmadu iha Portu Dili, Segunda nee (27/07/2026).
Nia dehan, sigaru nee faan iha Timor karun no sigaru ida kualidade nee, tanba nee sira deside hodi mai faan iha Timor.
“Bandeira Indonezia, maibe iha laran nee sidadaun Xineza mak barak iha laran,” nia informa.
Entretantu notisia neee tun iha Media STL, jornalista STL koko atu intervista ho portavoz PNTL, Superintendente Xefe Polisia, João Belo, maibe sei iha rai liu.
(jen)
