DILI, STLTIMORLESTE.com – Tribunal Judisial Primeira Instansia Dili (TJPID) iha loron Kinta (09/07/2026), halao julgamentu ba arguidu ho inisial AdS, tanba komete krime Arma Branka, lei numeru 5/2017.
Iha indisus sufisiente katak, iha loron 14 fulan Abril tinan 2024, por volta 2h30, testemunha Gastão Araujo Verdial membru PNTL Esquadra Dom Aleixo simu informasaun husi Delt Base hodi informa katak, arguidu kaer hela tudik ida iha nia liman bainhira tuir festa kazamentu.
Bainhira simu hotu informasaun ekipa patrulhamentu Esquadra Dom Aleixo desloka ba iha fatin akontesimentu Aldeia Baia Leste, Comoro, Dili, haree arguidu kaer hela tudik ho medida naruk 30 cm.
Polisia patrulhamentu detein arguidu lori mai entrega iha Polisia Investigasaun Esquadra Dom Aleixo, kontinua lori ba Tribunal halo primeiru interogatoriu.
Arguidu hatene katak bainhira kaer tudik iha fatin publiku hanesan kazamentu nee halao ema tauk, maibe arguidu nafatin lori tudik.
Arguidu halo krime nee ho livre, deliberada, konsientemente no hatene katak hahalok nee proibidu no hetan pena tuir lei.
Tanba nee, konsidera arguidu hanesan autor material ba krime Armas Brankas Lei n 5/2017.
Hatan ba akuzasaun nee arguidu deklara katak, faktus neebe konsta iha akuzasaun loos hotu.
Arguidu deklara katak, momentu neeba arguidu ba iha festa, tanba nee arguidu lori tudik ida sikat iha kanotak, maibe ho intensaun lori deit atu asegura nia aan, laos ho intensaun lori atu sona ema ruma.
Arguidu deklara, nia kostume kuandu lao sai gosta sikat tudik iha kanotak, maibe arguidu la iha problema ho ema ruma.
Arguidu arepende ona nia aktu nee, promete ba oin sei la sikat tan tudik iha kanotak, kuandu bainhira lao sai.
Aleinde nee, sasin Gastão Araujo Verdial hanesan membru PNTL deklara katak, momentu neeba iha festa ida arguidu ho kondisaun lanu, hamriik ba dansa no ema sira neebe iha festa haree arguidu sikat hela tudik ida, ho ida nee sira kontaktu kedan ba sasin.
Sasin esplika, sasin ho nia ekipa too iha fatin refere, sira detein kedan arguidu maibe sira haree katak, arguidu sikat deit tudik seidauk halo asaun ruma. Maibe haree arguidu nia kondisaun lanu sira tula arguidu mai iha eskuadra, hodi submete ba iha investigasaun.
Rona tiha arguidu, Tribunal husu atu tama ba iha alegasaun. Iha alegasaun Prokurador Hernani Rangel husu Tribunal atu aplika pena suspensaun ba arguidu. Enkuantu husi parte defeza nian husu Tribunal atu aplika pena neebe justu.
Rona tiha alegasaun, Tribunal adia ba loron seluk hodi rona desizaun.
Audensia julgamentu nee prezide husi Juiz Koletivu, Jose Maria, Ana Paula, Ersilia de Jesus, Ministeriu Publiku reprezenta husi Prokurador Hernani Rangel, arguidu hetan asistensia legal husi Defensor Publiku nain ida.
(ter)
