DILI, STLTIMORLESTE.com – Matebian Silvano Gomes la uza kapaseti hetan tiru husi Membru Polisia Nasional Timor-Leste (PNTL) iha Suku Irabin de Baixo, Postu Admimistrativu Uatocarabau, Munisipiu Viqueque, vitima nee hetan kanek grave evakua mai Hospital Nasional Guido Valadares (HNGV) hodi halo tratamentu, maibe labele salva nia vida, daudaun nee mate isin iha sala Mortoariu hodi hein karta mandadu husi Tribunal depois mak prosesu ba autopsia.
Xefe Mortoariu HNGV, Nilton Tilman hatete, matebain ho naran Silvano Gomes hetan tiru no daudaun nee mate isin iha sala Mortoariu HNGV hodi prosesu ba autopsia, maibe sei hein karta madadu husi Tribunal depois halo autopsia no entrega ba familia.
“Sim seidauk autopsia, tanba ita sei hein karta mandadu husi Tribunal, tanba nee sei hein oituan tan,” hatete Xefe Mortoariu Hospital Nasional Guido Valadares (HNGV), Nilton Tilman ba STL liu husi telefone iha nia knaar fatin, Segunda (17/08/2026).
Nia dehan, matebian iis kotu iha HNGV, no daudaun nee evakua ona mai iha sala Mortoariu HNGV hodi hein ba autopsia.
Iha fatin hanesan, familia matebian, Elizario da Silva esplika, familia hakarak lori prosesu nee tuir dalan legal, nunee prosesa membru PNTL tiru Matebian Silvano Gomes, tanba deit la uza kapaseti.
“Nia mate ona, klaru ami familia ninia prosesu nee tenke tuir lei, karik matebian mak sala mos la buat ida, mais prosesu tenke too Tribunal mak deside. Ami familia nia hakarak buat hotu-hotu tuir Lei, ohin Polisia koalia ona ho hau atu autopsia, hau autoriza autopsia para bele hetan evidensia ruma karik prosesu nee lao ba oin,” nia informa.
Nia deklara, agora daudaun nee matebian Silvano Gomes nia isin mate tau hela iha sala Mortoariu HNGV no akompanha husi familia no ekipa Polisia Forensik hodi konsulta malu atu submete mate isin hodi ba autopsia.
Nunee mos Sasin Xefe Suku Jose Baptista do Carmo koalia, baibain iha dadersan Polisia Tranzitu ba hein iha areador eskola EBC 13 oin, atu estudante sira ba eskola karik sira hapara kareta motor neebe halai ho velosidade, atu nunee estudante sira ultrapasa estrada ba eskola.
Nia haktuir, membru PNTL ida nee tiru Silvano Gomes iha kabun tanba vitima kondus motor la uza kapaseti iha Sabadu, 15 Agostu foin lalais nee haleu tuku 08;30 OTL.
Nia afirma, bainhira asidente nee akontese membru PNTL ho sira nia kareta transporta kedas vitima Silvano ba iha Sentru Saude Uatucarbau, depois halo tratamentu no ambulasia kontinua trasporta ba iha Munisipiu Viqueque hodi hein aviaun halo evakuasaun ba HNGV, tanba vitima nia kondisaun grave, tanba tiru husi kabun kanotak kotuk borus tiha kabun oin, tanba nee halo vitima lakon vida iha HNGV.
(jen)
