DILI, STLTIMORLESTE.com – Pasiente neebe kada fulan ba halo konsulta ho mediku espesialista sira iha Hospital Nasional Guido Valadares (HNGV), hodi simu aimoruk ba fulan ida nian, maibe dala ruma simu la kompletu, tanba dehan stok hotu, nunee husi parte farmasia nian fo deit lia menon depois semana ida mai cek fali.
Relasiona ho aimoruk essensial balun neebe stok hotu iha HNGV, halo pasiente sira neebe ba halo tratamentu kada fulan dala ruma simu aimoruk la kompletu, tanba husi parte hospital nian dehan, aimoruk refere hotu, no bele mai fali depois semana ida. Maibe realidade neebe pasiente sira hasoru depois de semana ida lori fali notas reseita neebe sira simu ba fali ospital, situasaun refere sei nafatin kontinua katak aimoruk seidauk iha ou seidauk tama.
Pasiente Ajeca Costa dehan, nia parte kada fulan sempre ba halo tratamentu ho dotor espesialista psikiatria sira iha HNGV. Ful-fulan sempre mai halo konsulta ho doutor, depois konsulta mak foin pasa reseita hodi ba simu aimoruk iha parte farmasia nian, maibe too iha nee dala ruma simu aimoruk la kompletu. Husi parte farmasia nian dehan, aimoruk oin ida nee hotu semana oin bele mai fali lori ho notas resesita neebe sira fo. Depois semana ida ba fali mais situasaun nafatin hela deit aimoruk ho naran carbamazepine (200mg) nee stok laiha.
Hau ba konsulta iha dia 12 foin lalais, maibe simu aimoruk la kompletu oin rua deit, falta ida. Nee mak hospital hameno dehan depois semana ida ba fali, nunee iha Tersa nee hau ba cek fali aimoruk ho naran carbamazepine neebe sira fo hela iha notas reseita nee, maibe too iha hospital dehan aimoruk nee seidauk iha, no sira hameno semana ida tuir mai mak ba cek fali. Neebe hau fila tiha deit mai uma hodi hemu deit aimoruk oin rua nee,” dehan nia ba STL iha HNGV, Tersa (16/06/20260).
Nia hatete, aimoruk neebe baibain nia simu iha oin tolu, maibe fulan rua tutuir malu nee simu deit oin rua.
Nia hatutan, ho situasaun stok aimoruk essesnsial balun neebe mamuk iha hospital nasional espera ba oin governu bele tau atensaun no hadia diak liutan para labele akontese hela deit nunee, tanba maluk balun husi munisipiu mak mai halo konsulta iha nee. Sira lakon tiha tempu no soe osan ba selu kareta nian, maibe depois too tiha iha nee mak dehan aimoruk laiha, nee sira nia laran susar no terus tebes.
Nunee mos Pasiente Terezinha de Fatima, kada fulan sempre ba halo konsulta ho dotor sira iha HNGV, maibe aimoruk neebe simu mak dala ruma la kompletu. Neebe tenke ba cek fali depois semana ida mak simu hodi hemu. Maibe bainhira hemi aimoruk nee senti diak, importante mak hahan ho buat neebe dotor sira bandu, tenke halo tuir atu nunee labele fo fali moras.
(dom)
