DILI, STLTIMORLESTE.com – Ministeriu Publiku (MP) iha nia alegasaun ba krimi Danu Simples, solisita ba iha Tribunal Singular atu kondena arguida ho inisial AAMS, tanba komete krimi hasoru lezadu ho inisial MMLC.
Iha alegasaun loron Kinta nee, Prokurador Renato Bere Nahac deklara katak, antes nee MP akuza arguida ho krimi Furto Simples, maibe iha sala julgamentu laran arguida deklara katak, uma lezadu nian laos ba sobu deit, maibe bee tama tiha mak arguida ba sobu, tanba nee husu Tribunal atu halo fali alterasaun kualifikasaun juridika ba iha krimi Danu Simples.
No MP mos haree katak, sasan lezadu nian arguida muda ses ba iha arguida sira nia uma, no sasan sira nee rai kleur balu aat ona.
Haree ba uma no sasan neebe arguida foti rai kleur no balu aat tiha, MP husu Tribunal atu aplika pena prizaun tinan 1 suspende tinan 2 ba arguida. MP mos husu atu arguida selu indemnizasaun kona-ba sasan sira neebe arguida foti iha lezadu nia uma rai kleur balu aat ona.
Enkuantu husi Defeza Marsal Masacrinhas deklara katak, arguida konfesa imparsial ba faktus, tanba nee husu Tribunal tetu sirkunstansia hotu atu bele aplika desizaun neebe justu ba arguida.
Rona tiha alegasaun, Tribunal adia ba loron seluk hodi rona desizaun.
Tuir akuzasaun neebe iha katak, iha loron 1 fulan Abril tinan 2023, lezadu baixa hela iha hospital no alta iha loron 3 fulan Maiu tinan 2023 atu fila fali ba uma.
Lezadu sai husi hospital ba tiha iha lezadu nia rian sira nia uma, depois lezadu nia rian mak fo hatene ba lezadu katak, arguida hasai lezadu nia sasan husi lezadu sira nia uma hodi ba tau hela iha arguida sira nia uma.
Rona ida nee lezadu haruka nia rian no nia feen ba haree uma, maibe sasan sira neebe tau iha uma laran la iha hotu ona.
Konsekuensia husi arguida nia hahalok nee, halo lezadu lakon nia sasan uma nian.
Tanba nee, Ministeriu Publiku akuza arguidu komete krimi Danu Simples.
Hatan ba akuzasaun neebe iha, arguida deklara katak, arguida muda sasan lezadu nian ba tau iha arguida sira nia uma, tanba rai neebe lezadu halo uma ba nee arguida nian.
Arguida deklara, momentu neeba bee mak sobu uluk tiha lezadu nia uma, depois mak arguida sobu tutan tan. Arguida dehan sasan lezadu nian hanesan televizaun, armariu, bikan kalen sira sei rai hela iha arguida nia uma, no sasan sira neebe aat ona arguida prontu fo fila sasan sira neebe aat ona.
Lezadu deklara, oras nee daudaun lezadu hela iha foho, tanba arguida mak sobu tiha lezadu nia uma no uma nee laos bee mak tama maibe arguida mak sobu deit.
Lezadu deklara, sasan neebe rai iha uma laran mak masa fan mina, bidon, televizaun, meza, kadeira, bikan no kalen uma nian no kulsaun.
Lezadu deklara, kona-ba uma neebe halo momentu neeba arguida mak bolu lezadu ba, no lezadu fo osan hodi selu tiha hudi balu neebe kuda iha rai nee, no lezadu rasik mak selu badaen sosa material sira hodi halo uma nee.
Hatan kona-ba se mak nain lo-loos ba rai neebe lezadu halo uma ba, lezadu la iha konhesimentu kona-ba ida nee.
Audensia julgamentu nee prezide husi Juiz Singular Jumiati Freitas, Ministeriu Publiku reprezenta husi Prokurador Renato Bere Nahac, arguidu hetan asistensia legal husi Defensor Publiku Marsal Mascarinhas.
(ter)
