DILI, STLTIMORLESTE.com — Tribunal Judisiál Primeira Instánsia Dili (TJPID) adia julgamentu ba krime rua ne’ebé akuzadu inisiál AGdS komete hasoru lezadu inisiál OAdC.
Juiz singular José Maria deside adia julgamentu atu fó oportunidade ba akuzadu selu indemnizasaun ba lezadu, antes tribunal kontinua prosesu kona-ba krime kondusaun perigóza.
Antes julgamentu hahú, juiz esplika katak krime ofensa ba integridade fízika simples, ho natureza semipúblika, bele taka se lezadu aseita dadaun keixa. Maibé, prosesu kona-ba krime kondusaun perigóza kontinua.
Iha audénsia, lezadu OAdC esplika katak nia hetan kanek grave iha ibun, to’o presiza tratamentu iha ospitál no hemu aimoruk tradisionál. Motorizada ne’ebé nia uza mós hetan estragu.
Lezadu husu akuzadu atu selu fila-fali osan ne’ebé nia gasta ba tratamentu médiku no hadi’a motorizada ne’ebé estraga tanba asidente ne’e.
Akuzadu deklara katak nia prontu atu fó osan US$ 600 ba lezadu, ho US$ 500 ba gastu tratamentu no US$ 100 ba reparasaun motorizada.
“Se arguidu fó US$ 500 hodi taka gastu tratamentu, no US $ 100 ba hadia motor hau aseita atu taka prosesu ne’e,” deklara lezadu.
Tanba ne’e, tribunal adia audénsia ba loron seluk, atu fó tempu ba akuzadu entrega osan indemnizasaun ba lezadu. Depois, tribunal sei deside kona-ba homologasaun ba dada-fila keixa no kontinua julgamentu ba krime kondusaun perigóza.
Tuir akuzasaun, iha 26 Agostu 2024, tuku 13h10, lezadu kondús motorizada Honda Beat, matríkula R 2274, husi Banku BNU, Dili, atu fila ba nia uma iha Becora.
Bainhira to’o estrada Becora, lezadu atu tama ba nia uma. Iha momentu ne’e, akuzadu ne’ebé kondús kareta Suzuki Alto ho velosidade estimada 50 km/h, koko ses kamioneta iha oin.
Akuzadu nia kareta konsege soke motorizada lezadu husi kotuk, halo lezadu monu ba rai no sofre kanek iha ibun, ne’ebé rezulta nehan rua nakdoko, no kanek iha kotuk, ain rua no liman rua.
Depois asidente, akuzadu kontinua kondús kareta. Membru komunidade sira hakilar hodi duni nia to’o Fatuahi, iha ne’ebé akuzadu para.
Akuzasaun mós hatete katak, akuzadu no lezadu iha ona problema antes akidente, tanba akuzadu deskonfia nia feen iha relasaun amante ho lezadu.
Tuir akuzasaun, depois akidente, akuzadu dehan ba lezadu: “Sorte o nian lae, lori kareta soke mate ita iha estrada.”
Ministériu Públiku konsidera katak akuzadu komete krime ofensa ba integridade fízika simples, tuir artigu 145, no krime kondusaun perigóza, tuir artigu 209, hotu-hotu husi Kódigu Penál.
Audénsia ne’e prezide husi juiz singulár José Maria, ho prokuradór Nelson Magno reprezenta Ministériu Públiku. Akuzadu hetan asisténsia jurídika husi Defensór Públiku José da Silva.
(ter)
