AMBENO, STLTIMORLESTE.com – Sekretariu Rejional Asuntu Administrasaun dehan, iha Planu Asaun Anual (PAA) tinan 2026 sei aumenta suku 9, Postu Administrativu 5 no Munisipiu 3.
Informasaun nee hatoo husi Sekretariu Rejional Asuntu Administrasaun, Andre Lao ba STL iha Salaun Munisipal Oekusi, Bairru Nunbei, kapital Oecusse, Segunda (14/03/2025) katak, ohin Diretores Planeamentu Nasional hamutuk ho Prezidente Autoridade Rejion Administrativu Espesl Oekusi-Ambeno (PA-RAEOA), Sekretariu Rejional sira hotu ho fokal pont sira, aprezenta sira nia PAA kada sekretariu rejional sira neebe organiza enkontru ohin husi Ministeriu Finansas (MF).
“Ohin foin maka ami halao reuniaun konaba PAA nian, tanba loron 21 Abril 2025, Autoridade RAEOA ho sekretariu Rejional sira hotu, tenke submete ona PAA tinan 2026 ba Ministeriu Finansas,” dehan nia.
Nia haktuir tan katak, liu husi enkontru nee, sekretariu Rejional sira preokupa ho tempu neebe limitadu maibe nafatin koopera ba malu hodi atinji metas neebe iha, atu tinan 2026 bele realiza ona programa rasik liu husi PAA.
“Ami husi parte Sekretariu Rejional Asuntu Administrasaun nian, ami hatama ami nia programa liu husi planu desentralizasaun poder lokal, ami planea ba kontrusaun ba edifisiu suku sira nomos ba postu administrativu nian, tinan oin 2026, ami planu atu hamosu tan postu foun 5 RAEOA. Iha Postu Administrativu Pantemakassar planu Postu 2, Postu Administrativu planu aumenta postu Pasabe ho Nitibe no Oesilo, aumenta Postu Administrativu ida. Kuandu Governu Sentral Aprova, ami sei halo konstrusaun ba edifisiu Postu Administrativu foun 5, ida nee mos atu kria mos kondisaun ba Munisipal, dadaun nee mesmu governu sentral sedauk fo matadalan mai ami, maibe ami esforsu preparativu hamosu Munisipiu 3, minimu 2 iha RAEOA,” dehan nia.
Nia akresenta, munisipiu nee aumenta tanba planu tinan uluk tempu rezistensia nian, hamutuk katuas resistensia sira iha Oecusse, halo serbisu ida neebe ke sensitivu tebes, husu ba natureza katak, bain hira TL hetan Independensia ka Ukun rasik aan, tenke hamosu munisipiu 3.
“Iha momentu neeba ami hanasan Centru Comunidade Sosial (CCS) ho naran CCS Ama Manat, (Amanat), CCS Ama Sila (Amsila) no CCS Ama Beonsila (Ambeno), ida nee promesa iha tempu resistensia, agora ukun rasik aan ona tinan 24 ba tinan 2025 ona, hau hanoin, tempu ona atu ita kria no hamosu Munisipiu tanba iha Oekusi hetan tratamentu espesial neebe hamahon aan iha RAEOA. Tanba nee RAEOA ho Governu sentral tenke prepara kondisaun atu hamosu munisipiu 2 ou tolu, tanba nee liu husi PAA, hau hamutuk ho ekipa, ami sei prepra hela, nunee tempu besik sei aprezenta ba PA-RAEOA aumesmu tempu Maun boot, Primeiru Ministru, Kay Rala Xanana Gusmao neebe planu atu vizita Oekusi, ami bele propoin bain PM husi Planu kona ba Oekusi-Ambeno,” afirma nia.
Nia dehan, dadaun nee mos halo suku preparativu hamutuk 9, tanba rua hotu ona maka Suku Kutete no Monemeko no suku 9 neebe preparativu nee husi Sekretariu Rejional Administrativu hatama ona iha projetu ho tipu Emerjensia liu husi programa Konselhu Administrasaun Fundu Infraestrutura (KAFI) Prezidente Autoridade RAEOA nian, edifisiu suku 9 nee tinan nee tenke halo.
“Suku Preparativu nee, ami halo ona relatoriu ba Ministeriu Administrasaun Estatal (MAE) nunee hetan ona asetasaun, tanba nee tinan ida nee, ita sei halo tan eleisaun suku, husi postu Administrativu Oesilo, Suku Bobometo fahe ba suku rua mak Suku Bob Uf no Suku Bobmanat, husi Postu Adminstrativu Pasabe, iha Suku Abani fahe ba rua, maka suku Haemnanu no Suku Bankeko. Iha Postu Adminstrativu Nitibe, iha Suku Lelaufe sei estabele suku ida naran Suku Hao Ufe no iha Postu Administrativu Pantemakassar iha Suku Cunha itta hamosu tan suku rua, ida naran Suku Maunaebeno no Suku Cunha B, iha Suku Naimeko sei aumenta tan Suku Naimeko II,” afirma nia.
(jos)
