AMBENO, STLTIMORLESTE.com – Diretor Servisu Rejional Edukasaun, Rejiaun Administrativa Espesial Oecusse-Ambeno (SRE-RAEOA), Vincencio Cono triste tanba konsege kaer toman profesores balun iha Oecusse nuudar manorin iha eskola, sempre tama eskola tarde, tanba nee bainhira tarde tama ona eskola, bainhira hasee SRE Oecusse finji la liga tiha.
Deklarasaun nee hatoo husi Diretor Servisu Rejional Edukasaun, RAEOA, Vincencio Cono, bainhira abertura asina kontratu ho funsionariu kontratadu sira iha Oecusse hamutuk 263 iha Salaun Edukasaun Santa Rosa Sidade Oecusse, Segunda (15/08/2026).
“Hau husu atu labele husik leet deit responsabilidade, ida nee estadu maka bolu ita boot sira, pontualidade, labele hanesan ohin iha Eskola Oemolo suku Lifau, Adjuntu Eskola Oemolo tama eskola tuku 8:30 menutus, Diretor Eskola Oemolo, ba eskola tuku 9:00, ida nee ohin ami nain rua kompak para hau haree tok manorin sira iha eskola neeba. Hau husu atu labele ibun boot ho Dirijente edukasaun, hirus hau laiha buat ida, maibe iha eskola, ita serbisu iha hirarkia de serbisu, serbisu tenke loyal,” dehan nia liu husi ninia deskursu.
Iha biban nee, nia husu ba professor sira atu hatudu atetude neebe diak iha komunidade nia leet, liu-liu ba Profesor, Gabinete Administrasaun Tekniku (GAT) sira, reja deit iha maluk vizinhu sira mos mestre la sai.
“Hau husu ba professor joven sira, tenke aprende buat barak, labele prinsipiu hanesan ema seluk dehan serbisu ou la serbisu, importante fulan-fulan simu osan, tanba nee hau hamulak ona, see mak serbisu tuir nia gostu deit, Bandeira RDTL sei hateke imi, sira neebe mate tiha ona hodi sosa liberdade ida nee, sira la husu buat ida, maibe ita neebe sei moris, hetan ona salariu goja ona Indepensia, hau hakarak ita ignifika sira nia luta too ohin loron, ita tenke orgulhu ba sira nia mehi katak ohin loron ita bele hetan nasaun Independensia,” dehan nia.
Iha fatin seluk, Domingos Elu nuudar komunidade Suku Costa dehan, profesores sira balun iha Oecusse, tama eskola tuir deit sira nia hakarak, ate balun loron tomak la tama, abandona fali estudante sira hodi lao tun sae iha Estrada ninin, balun tuur subar iha area dor eskola, bain hira husu sira dehan, mestre la tama neebe hein oras atu tama iha tempu tuir mai.
“Ami nuudar inan aman, haree situasaun ida nee triste, tanba nee husu ba governu atu kontrata guarde professor barak tau iha kada eskola, hodi kontrola profesores sira nomos estudante sira, karik loron ida professor la tama eskola, diretor eskola tenke buka meus atu labarik sira labele tuur muron iha ai mahon no tuur iha areador eskola, tenke tama iha salaun eskola ou biblioteka hodi hatoman aan ho lee barak, laos tuur iha liur,” dehan nia.
Nia rekomenda, ba Diretor eskola sira atu hamutuk ho inan aman kontrola oan, karik semana ida maka labarik nee la tama eskola, tenke justifika liu husi karta ida, indika ba inan aman atu justifika oan la eskola tanba saida, tanba realidade estudante balun mai eskola la tama aulas, ida nee ladun diak.
(jos)
