DILI, STLTIMORLESTE.com – Diretor Servisu Saude Munisípiu Dili (SSMD), Mateus Pinto husu komunidade idak-idak tenke limpeza iha kada Bairru, hodi prevene moras dengue.
“Ami nia sensbilizasaun lao nafatin ba kada bairu sira hodi eduka komunidade sira oinsa moris saudavel sira tenke hatene, tanba dala barak komunidade sira ladun preokupa kona-ba limpeza sira, entaun husi sensibilizasaun ida nee atu husu komunidade tenke kontribui hamoos ambiente, nunee hadook moras sira,” hatete Diretor Servisu Saude Munisípiu Dili (SSMD), Mateus Pinto ba jornalista sira iha nia knaar fatin SSMD, Formoza, Díli, Tersa (05/11/2024).
Nia dehan, udan monu rai daudaun ona, presiza komunidade nia konsiensia atu hamoos uma ninin no bee tanki no vazu aifunan sira, nunee susuk la bele moris ba hodi fo moras ba ema.
“Importante mak ambiente iha uma sorin-sorin, uma hun sira nee moos atu susuk la bele moris, ida nee tenke toma atensaun, tanba nee besik udan monu rai ita halo kedas fomigasaun nunee prevene, tanba ita nia komunidade iha Dili barak mak hakiak susuk iha roda, entaun roda neebe mak iha maibe la uza soe ka sunu, se hakarak uza entaun taka nunee bee la bele nalihun iha laran,” nia tenik.
Iha fatin ketak, Komunidade Carolino Soares husi Suku Komoro informa, komunidade seidauk iha konsiensia hodi hamoos idak-idak nia Bairu, tanba dala barak lixu sira nee soe deit ba iha valeta laran, depois pior liu mak haris fatin la hamoos nomos sira hakiak fahi.
“Ita haree komunidade balun iha konsiensia, balun laiha konsiensia, kontinua soe foer iha valeta, depois pior liu mak sira hakiak animal, hanesan fahi, Bibi, sira la hamoos ninia luhan, depois nia iis sai mai nee dois ida nee lori moras ba ita, tanba nee ita husu ba Governu tenke avizu labele hakiak animal iha Sidade dalan, no tenke Kontrolu para sira hamoos idak-idak nia bairu,” nia afirma.
(jen)
