DILI, STLTIMORLESTE.com – Sekretariadu Tekniku Administrasaun Eleitoral (STAE) halao formasaun ba tekniku 50, ba sistema foun biometriku neebe sei utiliza atu halo atendimentu eletores sira, no iha ema rihun 13 mak utiliza ona sistema foun hodi renova kartaun no halo kartaun.
Tuir Diretor Jeral (DJ) STAE, Elviro Fernandes Moniz hatete, formasaun ohin loron faze ikus liu husi preparativu neebe STAE halo, lori tempu naruk, hahu husi estudu viabilidade, orsamentu, halo akizasaun ba material, halo dezenhu ba sistema neebe ita bolu sistema informasaun resensiamentu eleitoral, ita halo ona pilotu no teste Munisipiu Dili no nivel nasional, halo atendimentu ba publiku liga ho nia sistema foun koligasaun baze de dadus biometriku.
Sistema biometrik nee halao ona iha Munisipiu Dili, eleitores neebe aktualiza ona kartaun foun ho sistema biometrik, besik ona 12 mil pesoas neebe hahu husi 15 Julhu, no eleitores foun neebe uza sistema foun nee mil resin, tanba nee total husi eleitores renova kartaun no eletores foun uza sistema biometrika 13 mil resin,” katak Diretor Jeral (DJ) STAE, Elviro Fernandes Moniz, ba joranlista iha edifisiu STAE Kaikoli, Tersa (15/10/2024).
Nia informa, ohin tama faze ikus liu, formasaun ba tekniku sira molok tun ba iha munisipiu hodi halo atendimentu ba eleitores sira, formasaun durante loron rua, ohin no aban foka liu ba operadores sistema sira, nomos ba IT sira kona-ba oinsa halo kooperasaun ba sistema foun neebe estabelese ona, nunee tun ba munisipiu hodi halo atendimentu ba eleitores sira laiha difikuldade oinsa halo operasaun ba sistema foun.
Tanba tuir kalendariu tentativa, apartir semana oin hahu estabelese ona sistema nee, nunee estabelese ekipamentus iha munsipiu hodi atende eleitores.
Nia haktuir, ho formasaun nunee iha konhesimentu detalhu hodi halao servisu iha munisipiu.
Nunee mos Komisaria Comicões Nasional das Eleições (CNE), Odete Maria Belo hatete, hanesan ema hotu hatene katak, STAE agora hahu ona introdus sistema biometrik iha servisu fatin hodi halo atendimentu ba eleitores sira, neebe hahu ona husi Munisipiu Dili.
Ho formasaun nee, signifika katak STAE sei introdus sistema biometrik nee ba iha munisipiu no postu sira, sistema nee diak tebes tanba foun, neebe nia metodu seguransa nivel aas ba minimiza falsifikasaun neebe dala ruma akontese.
Nia afirma, sistema nee diak tebes, espera katak ho formasaun neebe iha operadores STAE nian bele iha konhesimentu klean iha informasaun neebe kona-ba oinsa utiliza sistema nee hodi halo atendimentu ba eleitores.
(gui)
