DILI, STLTIMORLESTE.com – Problema falta stok kombustível iha Pertamina Esperansa Timor Oan (ETO) Dili rezolvidu ona, tanba fornesimentu foun husi Hera to’o Dili.
Funsionáriu Pertamina ETO Dili, Ajanu hatete ba STL, Segunda-feira (05/10/2026), katak gasolina RON 98 no bensin hotu ona iha dader, tanba konsumidór sira barak mai ense durante Sabadu no Domingu.
“Foin hotu ohin dader, tanba Sabadu no Domingu konsumidór barak mak mai ense. Maibé oras tan oituan sei to’o mai ona ba tanki ne’ebé mamuk,” dehan funsionáriu Pertamina ETO.
Nia hatete, falta stok ne’e la’ós akontese iha territóriu tomak, maibé limita de’it iha Dili, tanba tanke iha Pertamina ETO Dili mamuk.
Nia esplika katak, kareta tanki mina ETO ho matríkula A.53.643, porvolta tuku 09:30, lori kombustível husi Hera mai Dili atu enxe fali tanke ne’ebé mamuk.
Enkuantu ne’e, gasolina RON 92 sei iha stok no kontinua fornese ba konsumidór sira.
Presu gasolina RON 92 agora US$ 1,44 kada litru, aumenta husi US$1,41. RON 98 fa’an US$ 1,76 kada litru, kompara ho presu anterior US$ 1,61, no gazoel husi US$ 1,41 agora US$ 1,44.
Konsumidór Agustu Pires hatete katak nia mai Pertamina ETO atu ense motor ba atividade servisu, maibé hetan informasaun katak gasolina hotu ona.
“Ha’u senti preokupa no triste, tanba iha ne’ebá fa’an ho folin baratu kompara ho Pertamina sira seluk iha Dili,” dehan Agustu.
Nia hatutan katak, tuir informasaun husi funsionáriu iha fatin, kombustível sei to’o iha tuku 10 dader, depois kareta tanki lori husi Hera to’o Dili.
Agustu husu atu problema falta kombustível la dura tempu naruk, tanba falta mina bele afeta atividade komunidade, transporte no servisu sira.
(dom)
