BAUCAU, STLTIMORLESTE.com – Problema stok sementi ne’ebé seidauk tama prejudika prosesu implementasaun Programa Nasionál Dezenvolvimentu Suku (PNDS) siklu ualu tinan 2026 iha Suku Caibada, Postu Administrativu Baucau Vila, Munisípiu Baucau.
Xefe Suku Caibada, Cosme da Costa Lopes, esplika katak implementasaun PNDS siklu ualu iha 2026 simu alokasaun orsamentu rihun US$ 30 resin, ne’ebé destina ba atividade reabilitasaun estrada ho naruk aproximadamente kilometru (Km) 3, husi Aldeia Aurobu ba Suku viziñu Bahu.
Estrada ne’e konsidera importante ba komunidade, tanba kondisaun estrada durante ne’e aat no difikulta movimentasaun transporte públiku no privadu, liuliu ba komunidade ne’ebé uza dalan refere loroloron.
Iha implementasaun projetu ne’e, reabilitasaun estrada uza tipu cór beton no ateru. Servisu ateru responsabiliza husi kompaña Simples Unipessoal, Lda., enkuantu servisu cór beton responsabiliza husi kompaña Acelda Unipessoal, Lda.
Maski progresu fiziku projetu to’o ona 88%, atividade seidauk konsege konklui tanba falta stock sementi ba servisu cór beton.
“Estrada ne’e ita iha cór 150 metru. Agora daudaun ita atinji 88%, maibé ita sei hein tanba stock sementi seidauk tama. Entaun ita sei hein kompaña ne’ebé iha responsabilidade ba cór ne’e,” hateten Cosme ba STL iha Vila Antiga Baucau, Segunda (21/09/2026).
Cosme hateten katak, tuir planu, atividade PNDS 2026 iha Suku Caibada finaliza ona iha semana hirak liubá, tanba servisu ne’ebé hela atu konklui mak aproximadamente 12%.
Maibé, prosesu finalizasaun la’o kleur tanba iha problema iha fornesimentu sementi ba servisu cór beton, ne’ebé responsabiliza husi kompaña Acelda Unipessoal, Lda.
“Kestaun ne’e ita hato’o ona ba ekipa tekniku PNDS Suku no Postu atu koordena ho kompaña fornesedor refere hodi fó solusaun. Kompaña tenke asume responsabilidade, no ita mós fó hatene ona ba ekipa PNDS atu kontinua halo aprosimasaun ho kompaña hodi toma responsabilidade ba cór beton ne’ebé agora ita sei hein hela,” hateten Xefe Suku Caibada.
Nia subliña katak, komunidade hein atu projetu ne’e remata lalais, tanba estrada refere la’ós de’it fó benefísiu ba komunidade iha Caibada, maibé mós fasilita asesu ba komunidade Suku viziñu Bahu.
Atividade PNDS siklu ualu iha Suku Caibada liuhusi reabilitasaun estrada ne’e benefisia komunidade uma-kain 70 resin iha Aldeia Anauaru, inklui komunidade husi Suku Bahu, Postu Administrativu Baucau Vila.
(tom)
