DILI, STLTIMORLESTE.com – Instituto Superior Cristal (ISC) hetan subvensaun publika husi MESSK, no sei tau prioridade ba dezenvolvimentu jestaun aprendizajen, formasaun dosentes, akizasaun ba ekipamentus, komputador, no seluk tan.
“Ami iha nee primeiru nee ba iha dezenvolvimentu jestaun de aprendizajen, atividades formasaun ba dosentes, liu-liu ba instalasaun konfigurasaun, akizasaun ba ekipamentus laboratorium lingua português, no ingles, komputador liu-liu ba atividades aprendizajen ninia. Parte husi MESSK aprova mak sinquenta tres mil sentu sesenta novi,” dehan Reitor ISC, Sebastiao Pereira ba STL iha nia knaar fatin, Kuarta (22/04/2026).
Reitor ISC nee hatutan, semana liu ba asina ona ho MESSK, ohin mak foin foti MoU nee mai ,tanba nee subvensaun ida nee sei tau prioridade ba asuntu importante hirak neebe mak ohin mensiona nee.
Entretantu Reitor East Timor Coffee Institute (ETCI) Mateus Maia de Jesus, antes nee dehan, iha tinan 2025, ETCI la hetan subvensaun publiku, tanba hetan transformasaun.
“Hau hanoin kona-ba subvensaun, ami nian relatóriu hatama iha loron 15 Janeiru tinan 2025, maibe ida nee subvensaun neebe mak ami hetan husi MESSK iha tinan 2024 ninia, nee ami hatama ratoriu tuir kalendariu ministeriu nian. Ami iha 2025 la hetan subvensaun públika husi MESSK, tanba hetan transformasaun, tanba nee ba tinan 2025 ami la hetan subvensaun,” nia dehan.
Iha fatin seluk, Reitor Instituto Ciensia Saude (ICS) Leao Borges hatete, ICS submete ona proposta subvensaun publika 2026 ba MESSK, subvensaun refere sei fo apoiu dosentes no estudantes liu husi peskiza no formasaun ba lingua português.
“Ami nian montante subvensaun nee mak $49.624, nee subvensaun ba tinan 2026 nian,”katak nia.
Nia dehan, subvensaun ida nee uza sei apoiu dosentes no estudantes sira, tanba tinan nee ICS hetan subvensaun husi MESSK, nunee nafatin tau prioridade ba nesesidade instituto ninia, hodi apoiu estudantes no dosentes sira.
“Subensaun nee atu bele fo apoiu dosentes, peskiza no formasaun ba lingua português, hadia laboratorium, tanba nee ami uza subvensaun nee tuir nesesidade instituto nian neebe mak ohin hau mensiona,” nia haktuir.*
(jac)
