DILI, STLTIMORLESTE.com – Instituto Ciências da Saúde (ICS) seidauk simu subvensaun públika faze daruak ho valór 50% husi Ministériu Ensino Superior, Ciência no Kultura (MESSK), no agora hein hela pagamentu ne’e atu tama iha konta bankária instituisaun.
Reitor ICS, Leão Borges hato’o informasaun ne’e ba STL, Kuarta-feira (07/10/2026), no hatete katak, tuir konfirmasaun ho parte finansas, osan ba faze daruak seidauk tama.
“Subvensaun públika ne’e, to’o agora osan seidauk tama, tanba hau ko’alia ona ho parte finansas katak osan ne’e seidauk tama. Maibé faze primeiru nian 50% hotu ona, no ami submete ona relatóriu ba MESSK. Ami seidauk iha informasaun husi MESSK kona-ba pagamentu faze daruak,” afirma Leão Borges.
Nia hatete, 50% ba faze primeiru uza ona hodi apoia atividade peskiza, dosente sira no sosa ekipamentu prátika ba estudantes.
“Relatóriu ba faze primeiru ami hatama ona. Agora atu fó fali 50% ne’e, to’o agora ami sei hein hela bainhira MESSK bele atribui osan ne’e ba ami liu husi konta bankária,” tenik nia.
Iha parte seluk, Reitor Dili Institute of Technology (DIT), Salustiano dos Reis Piedade, antes ne’e hatete katak instituisaun ne’e hetan subvensaun públika ho orsamentu US$123,750.80, ne’ebé destina ba programa tolu.
Nia esplika, orsamentu ne’e inklui apoiu ba estudantes US$ 22,000, apoiu ba dosente US$ 56,000 no atividade sira seluk ho orsamentu US$ 45,750.80.
Salustiano hatete katak osan subvensaun ne’e foin tama, nune’e ezekusaun orsamentu seidauk to’o 20%, maski atividade sira planeadu ona no sei kontinua iha fulan sira tuirmai.
Nune’e mos Reitor Instituto Superior Cristal (ISC), Sebastião Pereira hatete katak, subvensaun públika husi MESSK importante atu apoia instituisaun ensinu superior sira hodi bele hadi’a no hasa’e kualidade.
“Hau hanoin subvensaun públika ne’e husi MESSK fó apoiu ba instituisaun ensinu superior sira, hodi fasilita sira atu bele aposta ba kualidade iha instituisaun ensinu superior,” dehan nia.
(jac)
