OE-CUSSE, STLTIMORLESTE.com – Suku Bobometo agradese ba Governu tanba apoiu Starlink, ne’ebé fasilita servisu administrasaun no atendimentu ba komunidade.
Tuir Sekretáriu Administrasaun Suku Bobometo, Jerónimo Osvaldo dos Reis, hateten Starlink ajuda sistema rejistu sira hala’o online.
“Antes Starlink, sistema sei hala’o offline, ne’ebé halo sincronizasaun dadus ho sistema nasionál sai difísil,” hatete Sekretáriu Administrasaun Suku Bobometo, Jerónimo Osvaldo dos Reis ba jornalista sira iha Sede Suku Bobometo, Tersa (06/10/2026).
Nia hateten, agora sistema bele hala’o online no fasilita sincronizasaun dadus populasaun ho sistema nasionál.
Nia tenik ,dadus ne’ebé bele prosesu inklui rejistu natalidade, mortalidade no livru rejistu administrativu sira seluk.
Nia esplika katak, koneksaun internet di’ak ajuda funsionáriu sira presta atendimentu ba komunidade ho lalais no efisiénsia.
“Starlink apoiu tebes ba servisu administrasaun suku. Servisu ne’ebé antes difísil agora fasil liután,” nia esplika.
Iha parte seluk, Xefe Aldeia Quiubecelo, Domingos Quelo, husu operadór telekomunikasaun hadia koneksaun internet iha Suku Bobometo.
Nia hateten, komunidade sei hasoru difikuldade asesu informasaun tanba koneksaun Telkomsel no Timor Telecom seidauk disponivel.
“Komunidade husu Governu koordena ho operadór telekomunikasaun atu hadia koneksaun, nune’e povu bele asesu informasaun,” nia afirma.
(jen)
