DILI, STLTIMORLESTE.com — Supervizaun fraku hamosu valeta iha Perumnas, Bairru Pite, Dili, monu fali, maski foin hadia iha fulan kotuk.
Kondisaun valeta ne’e hamosu preokupasaun kona-ba kualidade obra, kontrolu tékniku no responsabilidade parte relevante sira ba manutensaun infraestrutura públika.
Bazeia ba observasaun STL iha terenu, Tersa (06/10/2026), taka valeta rua ne’ebé taka ho simentu monu inklina tama ba valeta laran.
Kuak ne’ebé mosu iha valeta kle’an no luan, maibé la iha sinalizasaun ka avizu seguransa atu alerta ema ne’ebé liu iha área refere.
Kondisaun ne’e aumenta risku ba seguransa públika, liu-liu labarik, ferik-katuas no ema ne’ebé lao iha kalan.
Ema ne’ebé lao besik valeta bele monu ba kuak laran, enkuantu movimentu veíkulu mós bele hasoru difikuldade bainhira liu besik estrada ninin.
Alende problema estrutura, laran valeta mós nakonu ho foer hanesan botir bee, saku plastiku no kartaun, ne’ebé bele taka dalan bee.
Bainhira udan boot, foer ne’ebé taka valeta bele impede bee nia dalan, hamosu bee sae ba estrada no inundasaun kiik iha área refere.
Valeta ne’e foin hadia iha fulan kotuk liuhusi Governu, ho manutensaun ne’ebé ezekuta husi empreza ne’ebé responsavel ba obra iha fatin refere.
Maibé, depois de foin remata, estrutura valeta monu fali iha fatin hanesan, hamosu dúvida kona-ba kualidade obra no prosesu supervizaun.
Situasaun ne’e hamosu kritika kona-ba maneira Governu superviziona obra públika, liu-liu iha prosesu verifikasaun kualidade materiaál no implementasaun iha terenu.
Falta supervizaun direta bele halo obra la tuir padraun tekniku, enkuantu osan estadu ne’ebé uza ba manutensaun bele la fó rezultadu tuir expetativa.
Kona-ba kestaun ne’e, Observadór Polítika, Mariano da Cruz, konsidera valeta monu fali iha Perumnas, hanesan indikasaun ida kona-ba fraqueza iha supervizaun obra públika.
“Ne’e la’ós problema kiik deit. Governu selu osan, maibé kontrolu kualidade tenke forte atu povu la sai vítima.”dehan Mariano ba STL, iha Kaikoli Dili, Tersa (06/10/2026).
Mariano dehan, Governu tenke hadia sistema supervizaun, liuhusi ekipa téknika ne’ebé tun diretamente ba terenu atu verifica prosesu no kualidade obra.
Nia husu mós autoridade relevante atu responsabiliza kompañia ne’ebé la halo servisu tuir padraun, inklui obriga kompañia atu hadia fali obra ne’ebé la tahan.
Tuir nia, supervizaun ne’ebé forte importante atu garante osan estadu uza ho responsabilidade no infraestrutura públika bele tahan ba tempu naruk.
Iha fatin ketak, negosiante iha área Perumnas, Daniel Soares, lamenta kondisaun valeta ne’ebé monu fali tanba afeta atividade komersiál no movimentu komunidade.
“Ami haree fulan kotuk hadia tiha, maibé agora monu fali hanesan uluk. Ami husu atu hadia lalais tanba bee bele sae ba estrada.”hatete Daniel.
Daniel hateten, foer ne’ebé nakonu iha laran valeta mós presiza hamos lalais, tanba bele taka dalan bee no aumenta risku inundasaun bainhira udan boot.
Entretantu kazu valeta iha Perumnas agora hamosu teste ba autoridade relevante sira atu hatudu responsabilidade, garante kualidade obra no proteje seguransa komunidade.
(car)
