DILI, STLTIMORLESTE.com – Susubeen inan nian importante tebes ba labarik foin moris too tinan 2, susubeen inan fornese nutrisaun neebe bebe presiza hodi proteje bebe husi infesaun no moras sira.
Infermeira Maria da Costa hatete, susubeen inan importante tebes ba labarik neebe foin moris mai too tinan 2, tanba bele hasae labarik nia isin no imunidade neebe diak hodi kontra moras sira hotu. Tanba nee mak inan sira tenke fo susubeen ba bebe, labele ansi fo lalais susubeen formula.
Nia katak, inan sira neebe mak la fo susu bebe neebe foin moris too tinan 2, nia impaktu mak bebe sei hetan moras iha futuru, no bainhira moras inan sira sei kolen makaas liu. Susubeen inan nian hanesan investimentu ida ba futuru neebe saudavel.
“Bainhira ita investe fo susubeen inan nian, ita sei investe iha futuru ida neebe saudavel, matenek no forte liu ba ema hotu. Susubeen inan nee la sosa ho osan neebe karun, susubeen inan nee gratuita deit maibe bele salva moris, no hasae forsa ba kakutak no hamenus kustu ba kuidadu saude nian,” dehan nia ba STL iha Bairo Formoza, Tersa (04/08/2026).
Nia afirma, fo susubeen ba bebe diak mos ba inan nia saude, fo susubeen laos deit nuudar fonte nutrisaun neebe diak liu ba bebe, maibe mos ajuda proteje inan nia saude. Susubeen inan nian fornese nutrisaun neebe bebe presiza hodi proteje bebe husi infesaun no moras sira.
Inan Zulmira Soares dehan, susubeen inan nian nee importante duni ba bebe sira neebe foin moris no diak liu tan mak fo susubeen inan nian too bebe nee tinan 2. Bainhira bebe moris mai, infermeira no parteira sira lori kedas bebe mai inan sira hodi fo susubeen inan nian.
Nia haktuir, nuudar inan neebe hakarak buat diak ba oan sira iha futuru, diak liu halo tuir saida mak parte saude sira hanorin, atu nunee bele evita inspesaun ka moras oi-oin ba labarik. Bainhira fo susubeen ba bebe, inan sira mos tenke han ai-haan sira neebe iha nutrisaun, liu-liu ai-haan produtu lokal sira.
“Hau kous oan nain 3, ida ikun nee halo tinan 1 ona, hau sei fo susubeen hela ba nia. Ita fo susubeen inan nian nee diak liu, ita la hasai osan. Ita sosa deit mak ai-haan lokal hanesan batar, forekeli, lakeru, modo tahan no aifuan sira hodi han kahur ho etu, para susubeen sai makaas, atu nunee labarik sira bele susu ho diak no bosu,” tenik nia.
Iha sorin seluk, liu husi pajina media Organizasaun Mundial Saude (OMS), iha semana mundial fo susubeen inan nian, Reprezentante OMS Dr. Arvind Mathur fo hanoin mai katak, fo susubeen inan nuudar ferramenta ida neebe forte liu atu garante labarik Timoroan ida-idak sai forte ho saude saudavel neebe forte ba futuru.
(dom)
