DILI, STLTIMORLESTE.com – Tribunal Judisial Primeira Instansia Dili (TJPID) halao julgamentu ba arguida ho inisial ILST hanesan feen, tanba komete krime hasoru lezadu inisial SBF hanesan laen.
Tuir akuzasaun Ministeriu Publiku katak, lezadu moris hamutuk hanesan fen ho laen ho arguida ILST iha tinan 2020, iha oan nain 1 (ida) no ekonomikamente dependensia ba malu.
Iha loron 16 fulan Setembru tinan 2023, haleu oras tuku 12:00, otl iha Bidau Santa Ana Dili, arguida foti lezadu nia Laptop, hodi riba rahun tiha, hafoin arguida foti tudik dapur nian, hodi taa kona iha lezadu nia ulun sorin karuk, arguida foti tudik nee hodi ta lezadu nia util , arguida foti tudik nee taa tan lezadu kabas sorin karuk.
Konsekuensia direta husi arguida nia hahalok ofendidu hetan kanek nakles no ran sai barak iha ulun, hetan suku pontu 4, kanek nakles iha kanuruk hetan suku pontu 3, kanek iha kabas sorin karuk suku pontu 3.
Kauza husi arguida nia hahalok, tanba ofendidu sai serbisu sei ba kumprimenta nia tiu neebe halo tinan, wainhira to iha uma, tama ba uma laran, simu kedas tolok husi arguida no sona husi arguida.
Arguida halo ho forma livre deliberada no konsientemente, hatene katak, foti tudik dapur nian hodi ta kona iha ofendidu nia ulun sorin karuk, arguida lori tudik nee, hodi taa lezadu nia kanuruk, arguida lori tudik nee taa tan lezadu nia kabas sorin karuk, nudar meiu neebe aptu hodi hamosu ofensa ba lezadu nia isin lolon no saude.
Arguida hatene katak, nia hahalok nee proibidu no punidu tuir lei penal. Arguida komete aktu nee ho forma livre, deliberada no konsientemente, hatene katak kaer ka uza tudik neebe naruk liu sentimetru 10 (sanulu) hodi hakanek lezadu , nudar aktu neebe proibidu no punidu tuir lei.
Tanba nee Konstitui arguida nudar autor material ho forma konsumadu ba pratika konkursu krime 2 (rua) kirme ofensa ba integridade fizika simples ho forma violensia domestika 1 (ida), previstu no punidu tuir artigu 145 hosi Kodigu Penal konjuga ho artigu sira 2, 3 alinea d) no art. 35 alinea husi Lei Kontra Violensia Domestika n.º 07/2010, loron 07 fulan Jullu no krime Arma Branka 1 (ida), previstu no punidu tuir artigu sira 2º nº 1, al. b) no nº 2, al. g) ho 20, hotu-hotu husi Lei Numeru 5/2017, loron 19 fulan Abril, kona-ba Rejime.
Hatan ba faktus neebe iha arguida deklara katak, momentu neeba nia laen atu ba servisu maibe, laba fali servisu ba hemu fali tua. No arguida koko telefone ba lezadu maibe leadu la foti ida, ho ida nee lezadu fila mai uma arguida foin husu, mosu diskusaun.
Arguida deklara, iha diskusaun nee lezadu halo uluk agresaun ba arguida, tanba nee ikus mai atu defende an arguida foti tudik ida hodi kaer iha nia liman, maka arguida no lezadu dudu malu, ikus mai tudik kona iha lezadu nia liman.
Arguida deklara, momentu neeba lezadu kondisaun ran, ho ida nee arguida rasik maka lori lezada ba iha hospital, no suku hotu sira fila ba uma. Arguida deklara, ikus mai sira rejolve no agora sira diak malu ona, moris hamutuk hanesan fen no laen la iha problema ona.
Lezadu reforsa tan akuzasaun katak, momentu neeba sira diskuti malu, hadau malu tidik maka tudik kona lezadu.
Rona tiha arguida no lezadu, Tribunal husu ba iha MP atu tama ba iha alegasaun.
Iha alegasaun nee, Prokurador Bartolomeo de Araujo deklara katak, iha sala julgamentu laran arguida konfesa ba faktus, tanba nee husu Tribunal atu aplika pena prizaun tinan tolu, suspende ba tinan 3.
Enkuantu husi parte defeza nian iha alegasaun deklara katak, iha julgamentu ida nee arguida konfesa ba faktus, tanba nee husu Tribunal atu absolve arguida husi krime Arma Branka, no krime Ofensa Simples husu atu aplika pena multa.
Ikus mai Tribunal deklara, krime Ofensa la prense, ba fali iha krime Ofensa Resiproka. Tanba nee Tribunal hare lezada no arguida diak malu ona, deside homologa prosesu nee. No kondena arguida ho krime Arma Branka.
Rona tiha alegasaun, Tribunal adia ba loron seluk hodi rona desizaun.
Audensia julgamentu nee, prezide husi Juiz Kolektivu, Jose Maria, Ersilia de Jesus, Ana Paula, Ministeriu Publiku reprezenta husi Prokurador Bartolomeo de Araujo, arguidu hetan asistensia legal husi Defensor Publiku Henrique Mariz.
(ter)
