BAUKAU, STLTIMORLESTE.com – Estrada nasional diresaun husi area Trisula, Suku Fuiluro ba Lospalos Vila iha Munisipiu Lautem, tempu udan nakonu ho tahu no kondisaun estrada refere hela ho fatuk dahuluk neebe Governu lansa iha fulan Novembru 2025.
Komunidade Efrelinda Fe Jesus husi Suku Home, Postu Administrativu Lospalos aprezenta, estrada diresaun husi Postu Lautem ba Lospalos Vila liu husi area Trisula, Suku Fuiluro antes nee kondisaun aat, maibe Autoridade Munisipal uza oportunidade ambitu vizita ofisial Primeiru Ministru Kay Rala Xanana Gusmão ho nia komitiva ba Munisipiu Lautem iha fulan Marsu tinan nee, hodi halo manutensaun ba estrada refere liu husi ateru ho rai mutin, maibe la pres ho ekipamentu pezadu hanesan silindru, tanba nee atual kondisaun estrada refere prejudika komunidade sira nia movimentu ho transporte publiku no privadu.
“Ateru nee husi Lautem tama too Lospalos Vila, maibe husi Lautem too Rasa nian nee diak, mais husi Trisula nian tun fali ba Lospalos Vila agora grave liu, tanba nakonu ho tahu, nee realidade laos edit fali ho AI,” Efrelinda Fe Jesus hateten ba STL liu husi telefone, Kinta (09/04/2026).
Nia komenta, postajem sira kona-ba estrada refere neebe viral iha redi sosial laos manipula husi Artifisial Intelejensia (AI), maibe realidade neebe akontese iha terrenu no postajem refere nuudar reprezentante komunidade sira nia preokupasaun aprezenta Governu.
Tanba kondisaun estrada husi area Trisula Fuiluro ba Lospalos Vila atual kondisaun aat iha neebe tempu udan hamosu tahu difikulta komunidade sira nia movimentasaun ho transporte publiku no privadu.
“Ami rekomenda ba Governu atu aselera, tanba estrada nee foin lalais halo ona lansamentu primeira pedra quer dizer estrada nee atu halo ona, maibe too agora seidauk,” Efrelinda aprezenta.
Komunidade nee informa, estrada diresaun husi Lautem ba Lospalos Vila Governu liu husi Ministeriu Obras Publikas lansa ona fatuk dahuluk neebe hatuur direita husi Primeiru Ministru Kay Rala Xanana Gusmão iha fulan Novembru 2025 hetan akompanha husi Ministru Obras Publikas, Sekretariu Estadu Toponimia no Organizasaun Urbana inklui entidades seluk tan.
Nia sublina, projetu refere tuir planu atu halo reabilitasaun estrada urbana diresaun Lautem ba Lospalos Vila neebe tuir kontratu responsabiliza husi kompanhia internasional, maibe too ohin loron kompanhia manan nain seidauk destaka nia ekipamentus pezadu iha terrenu.
“Prezisa aselera ona, tanba ami komunidade la prezisa buat barak, ami hakarak mak dezenvolvimentu estrada nee, tanba estrada la diak ami komunidade faan produtu lokal susar,” Efrelinda sujere.
Entretantu estrada diresaun Lautem-Lospalos hamutuk kilometru 27.980, kontraktor ba projetu refere mak Chongqin International Constraction Corporation (China) ho valor orsamentu US$ 18,836,713.10 ho durasaun servisu loron 365 husi numeru kontratu Tender/177/MOP/2024.
(tom)
