DILI, STLTIMORLESTE.com — FALINTIL-Forsa Defeza Timor-Leste (F-FDTL) loke Tasa Xanana-Cosgrove 2026 hodi komemora tinan 27 chegada INTERFET iha Timor-Leste.
Xefe Estadu Maior Jenerál F-FDTL, Tenente Jenerál Domingos Raúl “Falur Rate Laek”, loke ofisialmente eventu iha Kuartél Jenerál F-FDTL, Fatuhada, Dili, Tersa nee (22/09/2026).
Serimónia ne’e partisipa husi Komandante 1.ª Brigada Austrália, Brigadeiru Jerál Rob Haertsch, hamutuk ho delegasaun hosi Austrália.
Falur Rate Laek hateten, Tasa Xanana-Cosgrove komemora kontribuisaun INTERFET ba restaurasaun dame no seguransa, no inisia dalan ba restaurasaun independénsia.
“INTERFET kontribui ho desizivu ba restaurasaun dame no seguransa no inisia dalan ba restaurasaun independénsia,” hatete Falur Rate Laek.
Nia mós hateten, komemorasaun ne’e importante atu haforsa amizade no rekoñesimentu entre povu Timor-Leste no Austrália, liuliu entre forsa armada sira.
“Tasa Xanana-Cosgrove reprezenta respeitu, rekoñesimentu, kamaradajen no amizade ne’ebé halibur ita,” nia deklara.
Nunee mos Brigadeiru Jerál Rob Haertsch hateten INTERFET, lideradu husi Austrália, mai Timor-Leste iha Setembru 1999, depoizde violénsia tuir Konsulta Popular.
INTERFET kompostu hosi Austrália no parseiru sira hosi nasaun 22, ho misaun atu restaura dame no seguransa iha Timor-Leste.
Haertsch hateten, liu hosi 10,000 pesoál internasionál servisu hamutuk iha misaun INTERFET durante períodu krusiál iha istória Timor-Leste.
Tuir Haertsch, Tasa Xanana-Cosgrove sai símbolu relasaun no kooperasaun entre F-FDTL no Forsa Defeza Austrália.
Tasa ne’e hala’o uluk iha 2019, durante komemorasaun tinan 20 INTERFET, no kontinua sai tradisaun anuál entre F-FDTL no Forsa Defeza Austrália.
Programa tinan ne’e inklui jogu inaugural feto, ne’ebé konsidera parte hosi dezenvolvimentu feto iha desportu no kooperasaun defeza.
Haertsch agradese F-FDTL, Governu no povu Timor-Leste, no ema hotu ne’ebé kontribui ba organizasaun eventu.
Nia mós fó parabéns ba partisipante hotu, liuliu feto sira ne’ebé partisipa iha jogu inaugural.
Haertsch hein, Tasa Xanana-Cosgrove sei kontinua hametin amizade entre Austrália no Timor-Leste iha tinan sira oin mai.
(jen)
