DILI, STLTIMORLESTE.com – Eskola sira sei tau prioridade ba matéria didátika ne’ebé profesor sira uza iha prosesu ensinu-aprendizajen, bainhira Konsesaun Eskolar tama iha konta eskola sira.
Kordenadora EBF Naroman, Joana Teresa Freitas, hatete ba STL iha nia fatin servisu, Tersa-feira (22/09/2026), katak prosesu KE iha eskola lao normal, maibé eskola seidauk simu osan tanba iha servisu administrativu balun ne’ebé seidauk remata.
“Konsesaun Eskolar durante ne’e iha ami nia eskola lao normal hela. Maibé, iha segundu períodu ne’e ami nia servisu barak, entaun husi eskola mak tarde duni. Tanba ne’e, ami seidauk foti osan KE. Semana oin ami bele foti ona. KE nee sai, ami sei tau prioridade liu ba prosesu ensinu-aprendizajen, liuliu matéria didátika sira ne’ebé profesor sira uza,” nia informa.
Nia hatete katak, osan KE sei uza tuir nesesidade no prioridade eskola, inklui asuntu saniamentu no nesesidade importante sira ne’ebé iha ona iha planu eskola.
Domingas Beatriz da Cunha, Kordenadora Pré-Eskolar Moris Foun I dehan, bainhira KE tama, eskola sei uza osan tuir nesesidade ne’ebé iha no sei presta konta liuhusi relatóriu ba Ministériu Edukasaun.
“Bainhira Konsesaun Eskolar ne’e tama, hau hanoin ami sei ezekuta tuir nesesidade eskola nian, tanba bainhira ita ezekuta hotu, ita sei prepara fali relatóriu hodi hatama ba Ministériu Edukasaun,” nia komenta.
Iha fatin seluk, Kordenadora EBF Vila-Verde, Josefina Maia, hatete katak eskola sei uza KE tuir nesesidade ne’ebé iha, inklui rezolve asuntu ki’ik sira iha eskola.
(jac)
