DILI, STLTIMORLESTE.com – Liu husi Taxa Xanana-Cosgrove iha ambitu komemorasaun loron INTERFET ba dala 27, Militar husi TL-Australia realiza jogu amizade hodi Hametin Kooperasaun F-FDTL-Forsa Australia, ekipa Forsa feto, Australia sai bensedor Primeiru ho skore 2-0 no ekipa Forsa Mane, F-FDTL sai primeru lugar ho Skore 3:0.
Tuir Coronel Marcelino Ximenes “RIZAI Reprezenta Xefe Estadu Maijor Jeral F-FDTL, Domingos Raul Falur Rate laek, liu husi ninia deskursu iha serimonia jogu amizade ikus nee, iha Kampu Futebol Demokrasia Lecidere Dili, Kuarta (23/09/2026) katak, Taça Xanana-Cosgrove mak eventu importante tebes, nu’udar eventu komemorativu ba loron 20 Setembru 1999 no mizaun internasionál, INTERFET, ne’ebé permite estabilizasaun no kria ambiente dame tuir turbulénsia no violénsia ne’ebé akontese hafoin referendu 30 Agostu 1999.
“Hau hato’o sentimentu rekonesimentu ba buat ne’ebé hala’o iha ne’e hosi forsa sira ne’ebé integra INTERFET, nafatin iha no sei dura ba nafatin,” dehan Coronel Marcelino Ximenes “RIZAI”.
Nia dehan, durante tinan sira ne’e, harii ona relasaun amizade ne’ebé forte liután hosi asaun kooperasaun. Relasaun ne’e sustenta relasaun forte bazeia ba respeitu, rekonesimentu, camaradagem no amizade, ne’ebé ikusmai demonstra liuhosi realizasaun kompetisaun rua, feto no mane, ne’ebé ita bele asiste.
“Hau agradese ba esforsu sira ne’ebé ema responsavel sira halo ba atividade ida-ne’e. Hau agradese mos ba prezensa Excelentíssimu Brigadéiru-Jenerál Rob Haertsch, Komandante hosi Brigada 1 Austrália, ne’ebé reprezenta ninia nasaun, no ba ema hotu ne’ebé partisipa iha INTERFET. Hau mos hato’o votos atu ambiente no sentimentu camaradagem no solidariedade ida-ne’e bele dezenvolve tan iha futuru,” haktuir nia.
Iha biban nee nia hakarak hato’o liafuan agradesimentu no parabéns ba atleta sira ne’ebé partisipa iha disputa Taça Xanana-Cosgrove, ne’ebé, ho espíritu kompetisaun saudável, hatudu iha kampu hotu-hotu.
“Kualidade sira ne’ebé ami temi ona antes — respeitu, amizade no camaradagem. Hau hato’o parabéns, liuliu ba ekipa ne’ebé manán, ne’ebé merese liu tanba nia esforsu hodi hetan vitória ne’ebé alkansa,” haktuir nia.
Iha biban nee, Brigadéiru-Jenerál Rob Haertsch dehan, iha Loron 20 fulan Setembru marka aniversáriu tinan 27 hosi chegada Força Internasional ba Timor-Leste lideradu hosi Austrália, INTERFET, mai Timor-Leste iha tinan 1999, iha komandu General Peter Cosgrove.
Nia dehan, Misaun INTERFET nian mak atu restaura dame no seguransa, depois de violénsia ne’ebé mosu tanba Timor-Leste hili ho maioria ne’ebé boot liu independénsia liuhosi Konsulta Popular.
Liuhosi INTERFET, Austrália hamutuk ho parseiru internasionál sira hosi nasaun 22, servisu hamutuk ho povu Timor-Leste atu ajuda garante seguransa no harii nasaun foun ida-ne’e.
Durante períodu badak INTERFET nian, liu hosi 10.000 pesoál internasionál servisu iha INTERFET. Sira bele orgullu ho kontribuisaun ne’ebé sira halo atu apoia povu Timor-Leste iha dalan ba harii nasaun no ukun-rasik-an.
“Hau hatene katak pesoál servisu nain barak hosi INTERFET fila fali mai Timor-Leste iha tempu ne’ebé dame liu, no sira reflete kona-ba realizasaun barak Timor-Leste nian, enkuantu Timor-Leste kontinua dezenvolve no prospera nu’udar Estadu soberanu, integra ho rejiaun liuhosi ASEAN no dezenvolve parseira metin ho ninia nasaun viziñu sira,” afirma nia.
Nia haktuir tan katak, Iha tinan 2019, nu’udar parte hosi komemorasaun 20.º aniversáriu INTERFET, realiza pela primeira vez Xanana-Cosgrove Shield Football Match iha Estadiu Nasionál, Dili. Ekipa veteranu sira joga partida amizade ida, ho Sir Peter Cosgrove no Sua Excelénsia Primeiru-Ministru Xanana Gusmão partisipa. Depois, Australian Defence Force (ADF) no F-FDTL hasoru malu iha partida futebol ho kualidade aas. Partida ne’e agora sai ona tradisaun anual ne’ebé Força Defeza sira hein no kontente atu partisipa.
“Tinan ida-ne’e, ita haree ona realiza partida inaugurál ba feto sira, no hau hein atu haree mos partida mane sira nian. Hau fiar katak partida ne’e sei hala’o tan iha espíritu amizade no camaradagem ne’ebé ita hotu iha, iha no li’ur hosi kampu desportu,” haktuir nia.
Iha biban nee nia hatoo obrigad bara tanba simu sira durante semana ida iha Timor Leste.
“Hau hatoo Obrigadu Barak ba ita-nia bondade boot tanba simu hau iha Dili durante semana ida-ne’e. Parabéns ba feto sira ne’ebé foin remata joga partida ida ho desempenhu ne’ebé di’ak tebes, no boa sorte ba mane sira ne’ebé sei hahú joga laiha tempu barak,” afirma nia.
Tuir observasaun STL iha Kampu Demokrasia Lecidere Dili, jogu futebol husi ekipa forsa militar Australia no Timor Leste, Ekipa forsa militar Feto maka sai bensedor primeiru ho Skor 2-0 no ekipa Mane, F-FDTL maka manan ho Eskor 3:0. Hafoin jogu kontinua tara medalha ba jogador sira ho oferese taxa, foto hamutuk no fahe malu.
(jos)
