DILI, STLTIMORLESTE.com – Operador Telemor sai hanesan patrosinador ofisial ba konektividade iha simeira siensia ba dezenvolvimentu 2026.
Operador telekomunikasaun líder atu fornese konektividade internet ba Lauriadu Premiu Nobel, manan nain Premiu Turing, no inovador global sira neebe halibur iha Dili.
Tuir komunikadu neebe STL asesu husi media Prezidensia Republika Domingu (23/08/2026) hatete, Komisaun Organizadora ba Simeira Siensia ba Dezenvolvimentu 2026 anunsia katak Telemor, operador telekomunikasaun no teknolojia dijital boot ida iha Timor-Leste, sai ona hanesan patrosinador ofisial ba konektividade iha Simeira Siensia ba Dezenvolvimentu 2026. Organiza husi Prezidensia Republika Demokratika Timor-Leste iha lideransa Prezidente Jose Ramos Horta.
Simeira nee sei halao iha 24–25 Agostu 2026 iha Sentru Konvensaun Dili (CCD), neebe akompana mos husi Sci-Tech Expo neebe sei halao husi 23–25 Agostu hodi halibur hamutuk Ganador Premiu Nobel, manan-nain Premiu Turing, Xefe Estadu sira, no sientista global líder sira iha tema “Siensia laos deit teoria. Siensia harii nasaun.”
Hanesan Patrosinador Ofisial ba Konektividade, Telemor sei fornese no apoia konektividade internet durante Simeira no Sci-Tech Expo, hodi garante asesu ho velosidade aas neebe fiavel ba delegadu sira, orador sira, ekipa media akreditadu sira neebe fornese kobertura direita (live), no vizitante rihun ba rihun neebe hein katak sei tuir eventu loron tolu nee iha Sentru Konvensaun Dili.
Telemor mak operador telekomunikasaun no teknolojia dijital boot ida iha Timor-Leste, opera hanesan marka komersial husi Viettel Timor-Leste, subsidiaria husi Grupu Viettel Vietnam nian. Telemor kobre too 96% husi nasaun nee liuhusi ninia rede fibra otika no rede movel neebe luan.
Kompanhia nia ofeta sira kobre serbisu movel no dadus, inklui kartaun SIM padraun no ba estudante sira, no mos apoiu ba SIM pakote dadus dijital neebe popular hanesan pakote T3 sira; plataforma dijital rasik inklui Timor TV no Kakoak serbisu finanseiru no pagamentu movel liuhusi Mosan; no solusaun korporativu sira hanesan jestaun ba frotas no rastreamentu karreta.
Ho ninia sede iha Timor Plaza iha Dili no opera iha eslogan “Hetan Diak Liu” (“Ba Moris neebe Diak Liu”), Telemor mos ativu iha area saude komunitaria, literasia dijital, no patrosíniu ba desportu lokal iha Timor-Leste tomak.
Xefe Ezekutivu (CEO), Telemor, Ethan hatete objetivu husi telemor simples mak atu hamutuk ema hotu iha Timor Leste iha momentu hotu.
“Ami nia objetivu iha Telemor simples deit atu lao hamutuk ho ema hotu iha Timor-Leste, iha momentu hotu neebe importante animasaun, edukasaun, koneksaun, ka hamriik iha foinsae Timor-Leste sira nia sorin wainhira sira duni tuir sira-nia mehi no sai hanesan ema neebe sira hakarak atu sai. No liu husi nee, atu lao hamutuk ho nasaun nee, harii infraestrutura dijital ba aban nian, hodi hakat ba sosiedade dijital ida no moris neebe diak liu ba ema hotu.” Katak CEO Telemor.
Kona-ba Simeira Siensia ba Dezenvolvimentu 2026 Simeira Siensia ba Dezenvolvimentu 2026 mak simeira internasional istoriku ida neebe organiza husi Prezidensia Republika Demokratika Timor-Leste iha lideransa Prezidente Jose Ramos Horta, neebe nia rasik hanesan Lauriadu Nobel ba Pas.
Halao iha 23–25 Agostu 2026 iha Dili, Simeira nee halibur hamutuk Ganador Premiu Nobel sira, manan-nain Premiu Turing, xefe estadu sira, no sientista global líder sira atu esplora oinsa siensia, teknolojia, no inovasaun bele impulsiona dezenvolvimentu sustentavel iha nasaun emerjente sira. Simeira nee halao hamutuk ho edisaun ba dala 4 husi Sci-Tech Expo Siensia. Teknolojia. Inovasaun. Oportunidade. neebe mak selebrasaun nasional ida kona-ba siensia, teknolojia, inovasaun, no edukasaun.
(eme)
