DILI, STLTIMORLESTE.com – Prezidente Republika (PR), Jose Ramos Horta hatete, tempu besik sei dekreta data eleisaun prezidensial 2027.
Prezidente Republika Jose Ramos Horta ba jornalista sira iha Palasiu Prezidensial Nicolau Lobato, Bairru Pite, Kuarta (05/08/2026) hatete, nia hakarak eleisaun prezidensial nee halo iha semana primeiru iha fulan Marsu 2027.
“Eleisaun prezidensial hau hanoin tenke halo primeira semana iha fulan Marsu 2027, tarde liu mak ida nee,” dehan Prezidente Republika Jose Ramos Horta.
Bainhira mak Prezidente Republika dekreta data eleisaun prezidensial? Hatan ba kestaun nee Prezidente Republika hatete, nia sei halo enkontru ho Ministru ESTATAL depois kontinua halo enkontru ho Primeiru Ministru Kay Rala Xanana Gusmão, remata mak sei dekreta data eleisaun prezidensial.
“Nee hau sei koalia lai, ohin ka aban ho Ministru ESTATAL depois Kinta feira ho Maun boot Xanana depois mak deside, hau hakarak anunsia antes sedu kedas para hotu-hotu bele prepara aan,” katak PR Horta.
Aleinde nee joven rejistensia husu Prezidente Republika kria komisaun ida nunee verifika antes Prezidente Republika Kondekora? Tanba joven rezistensia sira konsidera Prezidente kondekora ema neebe Prezidente konhese maibe ema barak neebe merese hetan kondekorasaun Prezidente la fo? hatan ba kestaun nee Prezidente Republika hatete, nia la ba reve ida, Prezidente Republika kontinua halo prosesu normal, laos Prezidente mak hader toba deside kedas.
“Hau simu rekomendasaun mai husi fatin barak-barak, bazeadu ba karta, ema halo rekomendasaun hau nia komisaun juridiku sira haree sira rekomenda, laos hau mak inventa naran, hau konkorda deit mak labele haluha ema simples sira, sira bee rekolha lixu nee, labele haluha aileba sira nuudar hau nia mandatu fo kondekorasaun ba aileba, fo kondekorasaun ba Timor-oan bisnis maibe estudu laiha,” katak PR Horta.
(eme)
