MANATUTU, STLTIMORLESTE.com – Polisia Nasional Timor Leste (PNTL) husu motorista sira neebe mak lori karreta no motor husi Dili ba idak-idak nia hela fatin hodi tuir loron finadu, halai neineik no labele komsumu alcohol (tua).
Lia hirak nee hatoo husi Segundu Komandante Munisipiu Manatutu, Inspetor Xefe Mateus da Costa Texeira ba jornalista sira iha Manatutu, Segunda (28/10/2024).
Segundu Komandante nee apela ba kondutor sira neebe mak tula pasajeiru labele ansi hakarak hetan lalais osan ou duni tempu haluha tiha katak, ema neebe mak sira tula nee, tanba husu atu halai neineik no kontrola kondisaun karreta antes halo viajen.
“Husi parte seguransa no tranzitu seguransa rodaviaria apelu beibeik ba kondutor sira ba pasajeiru no motorizada sira neebe mak husi Dili fila ba sira nia moris fatin hodi selebra loron matebian, halo favor haree kondisaun karreta ho motor, halai neineik lao iha lokraik no labele lao iha kalan, no lao kalan karik labele konsumu alkhol hodi perturva pasajeiru sira, bis sira nee talvez halai laos ho neineik maibe halai duni fali oras no duni hela osan entaun sira la hanoin sira tula ema mak iha laran entaun halai ho velosidade neebe mak makaas,” katak Segundu Komandante nee.
Tanba tuir sira nia haree dala barak kondutor sira lori karreta ho velosidade neebe mak makaas, sira nia intensaun oinsa mak too lalais no oinsa mak hetan pasajeiru entaun lakon mos kontrolu ikus bele hetan dezastre.
“Liu-liu sira halai kalan nee favor redus, bele karik halai iha loron para labele matan dukur no labele prezudika pasajeiru sira, ida nee mak ami nia mensajen, se karik sira husi munisipiu ba postu no suku, halai neineik, haree mos kondisaun transporte antes lao,” dehan nia.
Iha biban nee nia mos husu ba sidadaun sira neebe mak halo viajen diak liu halai iha tempu loron, tanba halai kalan bele dukur, tanba nee sujere halai iha tempu loron.
Entretantu Prezidente Republika, Jose Ramos Horta husu sidadaun hotu iha tempu finadu hadook aan husi hahalok violensia sira.
Prezidente Republika hatete, bainhira viajen husi Dili ba foho lao ho kalma no husu joven sira hadook aan husi hahalok sira violensia hodi hatudu respeita ba iha matebian sira.
(eme)
