DILI, STLTIMORLESTE.com – Tempu too ona atu harii Tribunal iha Munisipiu sira, atu lori justisa hakbesik ba iha komunidade sira.
“Hau nia hanoin tempu too ona atu harii Tribunal iha munisipiu sira, tanba iha ligasaun ho Lei numeru 25/2021, kona-ba Lei organizasaun judisiaria, neebe promulgadu iha tinan 2021, maibe too agora nia implementasaun nee seidauk masimu, tanba nee mak atu harii Tribunal sira iha munisipiu nee konkretizasaun husi lei nee rasik,” dehan Jurista, Sergio Dias Quintas ba STL iha Kaikoli, Kuarta (12/08/2026).
Tuir Sergio, iha artigu artigu 22 alinea C dehan katak, Tribunais judisiais primeira instansia nee iha munisipiu 13, tanba nee mak munisipiu sira nee presiza harii Tribunal para justisa nee besik liu povu neebe buka justisa.
Nia sublina, konaba rekursu humanu iha ona Majistradu Judisiais neebe adekuda, para bele halo servisu iha munisipiu sira.
Iha sorin seluk, Jurista Alexandre Corte Real dehan, harii Tribunal iha munisipiu ida nee sai hanesan parte importante ida atu lori justisa hakbesik ba iha komunidade sira, atu sira bele sente katak justisa nee iha duni.
“Ita bele dehan harii ona Tribunal iha munisipiu atu nee julgamentu nee labele halao deit iha kapital sira, maibe besik ba iha komunidade sira nia horik fatin,” dehan nia.
Nia dehan, se harii ona Tribunal iha munisipiu, autor Judisial sira bele koloka iha neeba atu apoiu Tribunal hodi redus kazu pendente neebe iha. Tanba kazu balu pendente laos rai hela, maibe dala ruma ho distansia dook parte balu la mai kazu nee kontinua adia, bele halo numeru pendente kontinua iha.
Nia konsidera, pertinente tebes harii Tribunal iha munisipiu atu lori justisa hakbesik ba iha komunidade sira, no redus kazu pendente neebe iha.
Aleinde nee, Prezidente Tribunal Rekursu, Afonso Carmona dehan, planu sei harii uluk Tribunal iha Munisipiu Viqueque, Ermera, Maliana, no sei hadia mos Tribunal Baucau.
“Sei harii uluk Tribunal iha munisipiu tolu, aleinde mos hadia Tribunal Baucau, depois mak sei haree fali oinsa atu harii tan iha munisipiu sira seluk,” dehan nia.
Afirma tan, objetivu harii Tribunal iha munisipiu atu lori justisa hakbesik ba iha komunidade sira, nomos redus kazu pedente neebe iha.
(ter)
