DILI, STLTIMORLESTE.com – Tuir Komunikadu Imprensia neebe STL asesu iha pajina media F-FDTL katak, Xefe Estadu Maior Jenerál FALINTIL-Forsa Defeza Timor Leste (F-FDTL), Tenente Jenerál Domingos Raúl “Falur Rate Laek” halo serimonia despedida ba militar nain rua husi FALINTIL-Forsa Defeza Timor Leste (F-FDTL), neebe sei ba kumpri misaun iha Sudaun do Sul iha tempu besik.
Militár nain rua mak husi Major Graduadu Guido Jeronimo Guterres no Kapitaun Graduada Leandra Ferinda Gonzaga no sai mos hanesan momentu historiku ida ba F-FDTL, tanba ofisial feto dahuluk ho postu kapitaun ba kumpri misaun ba paz iha nasaun Sudaun Sul durante tinan ida.
Entretantu militar nain rua refere sei aranka husi Timor Leste ho orariu ne’ebe la hanesan, nunee Major Graduadu Guido Jeronimo Guterres Sei aranka iha loron 14 fulan Agostu 2026 no Kapitaun Graduada Leandra Ferinda Gonzaga sei aranka iha loron 21 Fulan Agostu 2026.
Enkuantu serimonia despedida nee, Xefe Estadu Maior Jenerál FALINTIL-Forsa Defeza Timor Leste (F-FDTL), Tenente Jenerál Domingos Raúl “Falur Rate Laek” hatoo orientasaun no mensajen ba militár nain rua atu halao sira nia misaun ho responsabilidade, disiplina, integridade no profisionalizmu.
Xefe Estadu Maior Jeneral F-FDTL mos enkoraja sira atu kumpri sira nia misaun ho dedikasaun no kompromisu, nafatin mantein ho imajen diak F-FDTL no lori naran diak Timor Leste durante sira nia misaun iha Sudaun do Sul.
Depois serimonia nee mos sai hanesan importante apoiu no votus diak ba militar nain rua, ho esperansa katak sira sei kumpri sira nia misaun ho susesu no fila fali ba Timor Leste iha kondisaun diak.
(jen)
