DILI, STLTIMORLESTE.com – Liu husi Komunikadu neebe STL asesu iha media F-FDTL katak, Xefe Estadu Maior Jenerál F-FDTL Tenente Jenerál Domingos Raul “Falur Rate Laek”, ofisialmente relansa róo patrulha NRDTL Jaco iha Doka Behau, hafoin remata prosesu manutensaun neebe halo roo nee para operasaun durante tempu naruk.
Nia hatoo apresiasaun ba IX Governu Konstitusionál, liu husi Ministeriu Defeza (MD), ba kompromisu no esforsu atu halo NRDTL Jaco fila ba servisu. Tuir nia, prezensa roó patrulha iha tasi importante tebes atu asegura soberania, monitoriza área marítima no proteje interese nasionál.
Tenente Jenerál Falur Rate Laek nee esplika, Timor Leste hasoru dezafiu hanesan peska ilegal, tráfiku no komersiu ilísitu, neebe presiza kapasidade naval neebe forte no permanente. Tanba nee, nia subliña katak Komponente Naval iha papél importante atu suporta dezenvolvimentu ekonomia azul no proteje rekursu tasi ba jerasaun sira tuir mai.
Nia mos halo apelu ba Governu atu kontinua investe ho efisiénsia iha setor defeza no seguransa, evita investimentu repetitivu, no konsolida doutrina uzu hamutuk entre instituisaun sira.
Atualmente, NRDTL Jaco fila ona ba operasaun normal, no la kleur tan NRDTL Betano mos sei prontu. Tan nee, XEMGFA husu Governu atu garante manutensaun regulár ba roó sira no konsidera sosa tan róo patrulha oseánika (OPV) ida atu reforsa kapasidade monitorizasaun Zona Ekonómika Eskluziva Timor-Leste.
Iha remata, XEMGFA agradese ba Mariña Portugál no Governu Austrália ba apoiu kontinuu iha dezenvolvimentu Komponente Naval F-FDTL, liu husi apoiu tékniku no formasaun rekursus umanus.
Nia mos bolu ba tripulasaun naval sira atu tau matan di’ak ba NRDTL Jaco, tanba manutensaun diak ba róo signifika soberania nasionál neebe metin no preparadu atu defende interese Timor Leste iha tasi.
(jen)
