DILI, STLTIMORLESTE.com – Tribunal Judisial Primeira Instansia Dili (TJPID) halao julgamentu ba arguidu ho inisial JRdJ, tanba komete krime tolu.
Iha indisius sufisiente katak, iha dia 21-08-2021, por volta 10h00, iha postu seguransa Motahare Munisípiu Ermera, lezadu JM ho nia membru nain tolu ajente XM, LS no RJM halo chek point ba sidadaun sira tama sai tenki hatudu Kartaun vasina.
Arguidu JRdJ iha tempu neeba kondus kareta marka Ford Ranger, xapa Matrikula A.18-451 TL, bainhira too iha postu entrada ekipa kontrola haree katak arguidu foin mak vasina dala ida, nunee membru sira hatete katak ita boot labele tama no tenke fila fali ba Dili.
Arguidu la simu desizaun Polisia nian hodi foti kareta ho velosidade halai korta dalan liu husi mota laran hodi ba sai iha Railaku Vila, maibe bainhira nia atu tama iha Railaku vila komandante JM too uluk iha fatin refere hodi haruka arguidu koopera, maibe arguidu kontinua la koopera no halai fila fali ho kareta liu nafatin husi mota laran ho velosidade makaas.
Lezadu nafatin tuir arguidu ho motorizadu xapa matrikula 16.03 G. Mai hein iha postu entrada no molok arguidu too iha fatin akontesimentu no husi distansia 100 metrus lezadu foti liman fo sinal katak halai neineik no para, maibe arguidu la koopera no kontinua halai ho velosidade makaas, ikus mai arguidu soke lezadu rabat ho motorizadu, lezadu konsege salva nia aan halai sees no motorizadu Tranzitu nian hetan estragus iha nia almosador oin parte karuk, xapa kleuk no gas koplin kleuk no labele uza motor nia body hetan ros iha rai.
Arguidu pratika nia konduta sira nee ho forma livre, deliberada ho konsiensia rasik, lakohi koopera ho autoridade Polisia no la obedese ba ordem neebe mak iha hodi ikus mai hamosu perturbasaun ba servisu Polisia nian, hatene hela katak hahalok sira nee krime no lei bandu, maibe arguidu hakarak halo nafatin hanesan saida mak deskreve iha leten.
Ho hahalok sira nee, Konstitui arguidu JRdJ nuudar autor material ho forma konsumada ba Pratika konkursu krime tolu Desobedensia, obstrusaun ba autoridade no Dano ho violensia tuir artigo 244, 243, 260 norma sira hosi Kodigu Penal Timor Leste.
Iha sala julgamentu, arguidu hili direitu nonok no la fo deklarasaun ba faktus sira neebe mak Ministeriu Publiku duun ba arguidu.
Nunee Tribunal deside hodi rona deklarasaun lezadu no sasin sira nia.
Iha audensia julgamentu nee lezadu JM deklara katak, iha momentu neeba lezadu nudar Xefe seksaun, destakamentu iha area Mota Haree, maizumenus iha tuku 10 dader arguidu nudar motorista JRdJ, lori kareta sai husi Dili ba area Mota Haree, bainhira to iha area refere, lezadu para kareta haree arguidu tula feto ida hodi husu arguidu bainhira ema ruma hakat iha Mota Haree ne’e tenke simu vaksin dala rua no hatudu Kartaun vasinasaun dala rua, maibe arguidu hatan katak arguidu foin mak simu vaksin dala ida no nia kolega feto neebe mak arguidu tula nee seidauk vaksin.
Lezadu husu ba arguidu, tanba arguidu ho nia kolega feto seidauk vaksin, tanba nee sasin haruka arguidu ho nia kolega feto katak, ita-boot sira labele hakat liu hosi Mota Haree no tenke ba fali Dili hodi vaksin tiha lai, tanba momentu nee situasaun COVID-19 nia laran.
Lezadu esplika, bainhira sasin para tiha kareta iha ponte rohan, derepente arguidu la husu lisensa nia korta iha Mota laran atu ba iha area Rai Laku, nunee lezadu uza motor hodi duni lezadu liu hosi estrada boot no lezadu too uluk iha sentral RaiLaku no konsege hasoru malu ho arguidu sira.
Sasin SG nuudar Membru PNTL iha komandu Munisípiu Kovalima, deklara katak iha momentu akontesimentu nee sasin sira halo seguransa iha area Mota Haree Munisípiu Ermera iha dadersaan besik tama ba meiudia, sasin sira hamutuk nain-haat halo seguransa iha fatin refere hodi halo pasa revista ba sidadaun sira neebe mak atu ultrapasa iha Mota Haree, tanba tempu COVID-19, entaun estadu emerjensia.
Sasin deklara, iha pasa revista ba arguidu sira nee sasin husu arguidu ho nia kolega feto, maibe sira hatan katak Kartaun vaksin la iha, tanba nee sasin dehan ba arguidu sira katak bainhira sidadaun sira neebe mak hakarak ultrapasa iha Mota Haree tenke hatudu nia Kartaun vaksin, maibe arguidu ho nia kolega Kartaun la iha, entaun bele ba koalia ho Xefe seksaun, nunee kona-ba akontesimentu nee arguidu la haree no rona deit saida mak akontese.
Hafoin rona tiha deklarasaun sira nee, Tribunal deside hodi tama ba alegasaun Ministeriu Publiku no parte Defeza nia.
Iha alegasaun Ministeriu Publiku reprezenta Prokurador, Ricardo Godinho Leite deklara, Ministeriu Pbliku akuza arguidu ho krime tolu, nunee durante prosesu julgamentu lao arguidu hili direitu, tanba nee Tribunal deside hodi rona sasin sira nia deklarasaun.
Tanba nee iha alegasaun Ministeriu Publiku husu Tribunal atu kondena arguidu ba krime tolu ho pena prizaun tinan rua no suspende ezekusaun ba tinan rua.
Nunee Defeza haree ba faktus sira nee hotu, husu Tribunal atu halo alterasaun kualifikasaun ba krime rua no mantein krime dezobidensia, tanba nee husu Tribunal atu deside tuir konviksaun Tribunal nia, tanba arguidu hili direitu nonok.
Hafoin rona tiha parte sira nee Tribunal deside muda desizaun ba iha loron 21 fulan Maiu ho tuku 5:00 loraik.
Audensia Julgamentu nee prezide husi Juiz kolektiva, Ercilia de Jesus, José Maria, Ana Paula Fonseca, Ministeriu Publiku reprezenta husi Prokurador Ricardo Godinho Leite, arguidu hetan asistensia legal husi Defensor Publiku Angelmo Pinto Akara.
(ter)
