DILI, STLTIMORLESTE.com – Timor oan atus ba atus entuziasmu simu Boxista El-Matador, Delio Anzaqeci Mouzinho ho Daniel de Assis, iha Aeroportu Internasional Prezidente Nicolao Lobato, Comoro.
Boxista “El Bruto” ho naran Kompletu, Delio Anzaqeci Mouzinho agradese tebes ba Timor-oan hotu neebe ohin bele fo tempu hodi hein iha Aeroportu Internasional Prezidente Nicolao Lobato, Comoro, Dili.
“Hau sente kontente tebes, tanba ohin Timor-oan barak mai iha nee simu ami, ami agradese tebes, mai ita halo rame ita nia rain,” hatete Boxista Delio Anzaqeci Mouzinho ba jornalista sira iha Aeroportu Internasional Prezidenti Nicolao Lobato, Comoro, Tersa (28/07/2026).
Tuir observasaun neebe iha, Boxista Timoroan nain rua nee too iha Aerportu Internasional Prezidente Nicolao Lobato, iha tuku 13:00 meudia, simu direita husi dirijente sira husi Klubu Boxing El-Matador inklui familia no kolega sira.
Boxista nain rua nee sai husi Aerportu Internasional Prezidente Nicolao Lobato akompanha husi familia, kolega no apoiante sira hodi kontinua halo pawai haleu iha kapital Dili.
Hafoin too iha Igreija Motael oin, Boxista nain rua hamriik minutu balun iha Igreija Motael no estatutua Sebastião Gomes nia oin, hafoin nee boxista nain rua kontinua pawai ba Palasiu Governu, kontinua ba Rotunda Francisco Xavier do Amaral iha Merkadu Lama no kontinua ba fatin seluk.
Entretantu selebrasaun vitoria husi Boxista Delio Anzaqeci Mouzinho ho Daniel de Assis haleu kapital Dili, hetan seguransa masimu husi Polisia Nasional Timor Leste (PNTL).
Antes nee Boxista Timor oan nain rua husi Klubu Boxing El-Matador marka istoria foun ba Timor Leste hafoin oferese sintu HSS pro ba Timor-Leste, iha palku Hw Sport Night (HSN) Bali, Indonezia.
Boxista Delio Anzaqeci Mouzinho konsege hadau sintu OPBF WBC husi Boxista Saroha Lumbantobing husi Indonezia, Boxista ho naran Daniel de Assis Belo oferese sintu HSS pro ba Timor Leste hafoin halakon boxista Prastio, iha palku Hw Sport Night (HSN) Bali, Indonezia.
Vitoria neebe Boxista “El Bruto” hetan bainhira kompete ho boxista husi nasaun Indonezia ho naran Saroha Lumbantobing no iha kompetisaun nee “El Bruto” konsege hatudu prestasaun neebe diak hodi manan Saroha ho pontu diferente.
Enkuantu Boxista “El Asasino” hetan vitoria hafoin halokon Boxista Indonezia Prasito ho TKO iha ronde datoluk, ho vitoria TKO nee absoluta “El Asasino” iha direitu absoluta manan sintu ida neebe signifikante.
(alb)
