DILI, STLTIMORLESTE.com – Vise Primeiru Ministru no Ministru Koordenadór Asuntu Sosiál, Ministru Dezenvolvimentu Rural no Habitasaun Komunitária, Mariano Assanami Sabino, husu ba bolseiru Timor oan sira ne’ebé sei kontinua estudu iha rai liur atu foka ba edukasaun, hasa’e koñesimentu no matenek, no bainhira remata estudu fila mai Timor Leste atu kontribui ba dezenvolvimentu nasaun, laos envolve aan iha konflitu ka kria problema entre Timor-oan sira iha rai liur.
Pedidu ne’e hato’o hosi Mariano Assanami Sabino iha serimónia despedida bolseiru Timor-Oan hamutuk 45 ne’ebé hetan bolsa-estudu hosi Governu Indonézia atu kontinua estudu iha universidade 16 iha Indonézia. Serimónia ne’e hala’o iha Sentru Kultura Indonézia (Pusat Budaya Indonesia), Dili, Segunda-feira (24/08/2026).
“Hau husu ba bolseiru sira hotu ne’ebé eskola iha rai liur atu estuda maka’as, investe idak-idak nia an iha siénsia no matenek. Laos Timor-Oan ho Timor-Oan buka malu hodi estraga malu liuhosi organizasaun oioin. Timor-Oan iha rai liur tenke ajuda malu,” dehan Mariano iha ninia diskursu.
Nia hateten katak estudante Timor-Oan sira iha rai liur tenke uza oportunidade ne’ebé hetan atu aprende no dezenvolve kapasidade, tanba bolsa-estudu ne’e objetivu prinsipal mak dezenvolve rekursu umanu Timor-Leste.
“Bainhira remata eskola, fila mai Timor atu hadia ita-nia rain ho siénsia no matenek ne’ebé ema fó ba ita,” dehan nia.
Mariano mos hato’o apresiasaun ba Governu Indonézia ne’ebé kontinua fó apoiu ba Timor-Leste iha área dezenvolvimentu rekursu umanu liuhosi programa bolsa-estudu ba estudante Timor-Oan.
Bolsa-estudu sira ne’e oferese liuhosi kooperasaun entre Governu Timor-Leste no Governu Indonézia, ho envolvimentu hosi Ministériu Edukasaun, Ministériu Finansas no ministériu relevante sira seluk.
Iha serimónia ne’e, bolseiru Abrao de Jesus, ne’ebé hetan bolsa-estudu iha área Informátika, Fakuldade Komputasaun no Siénsia, hateten katak nia sente orgullu tanba konsege pasa prosesu seleksaun bolsa-estudu ne’ebé kompetitivu.
“Hau sente orgullu ho bolsa-estudu ne’ebé oferese hosi Governu Indonézia liuhosi kooperasaun ho Governu Timor-Leste, Ministériu Edukasaun, Ministériu Finansas no ministériu sira seluk. Kompetisaun ba bolsa-estudu ne’e ema barak, maibé hau konsege pasa. Tanba ne’e, hau agradese ba Maromak no Governu Indonézia liuhosi Embaixada Indonézia iha Timor-Leste,” dehan Abrao.
Abrao promete atu uza oportunidade ne’e ho diak liuhosi estudu maka’as, remata estudu iha Indonézia no fila mai Timor-Leste atu kontribui ba dezenvolvimentu nasaun tuir koñesimentu no matenek ne’ebé nia hetan.
Enkuantu ne’e, Filomena de Jesus Sena, inan hosi bolseira Angelina de Jesus dos Santos, ne’ebé sei kontinua estudu mestradu iha Jogjakarta, Indonézia, hateten katak nia sente kontente tanba nia oan konsege pasa prosesu seleksaun, maski mai hosi área rurál iha Ermera.
“Hau sente kontente tanba hau-nia oan bele hetan bolsa-estudu atu kontinua estudu mestradu iha Indonézia. Maski nia mai hosi área rurál Ermera, maibé hau agradese tanba nia konsege pasa seleksaun atu eskola iha rai liur,” dehan Filomena.
Filomena konsidera mensajen hosi Vice-Primeiru-Ministru Mariano Assanami Sabino importante ba estudante Timor-Oan sira ne’ebé sei eskola iha rai liur.
Nia husu ba oan sira atu aproveita oportunidade bolsa-estudu ne’ebé hetan hodi buka koñesimentu no matenek, tanba prosesu atu hetan bolsa-estudu presiza esforsu no luta ne’ebé naruk.
“Tanba ne’e, hau husu ba oan sira atu ba ema nia rai, estuda no buka koñesimentu, laos buka problema,” dehan Filomena.
(jos)
